ఏ పూజా క్రతువుకు
పనికి రాని పువ్వులం
ఏ విలువల సేద్యానికి
అక్కర్లేని అంకురాలం
ఏ సంఘానికి పట్టని
నిరర్థక నిష్ఠూరులం
ఏ చరిత్ర పుటలకెక్కని
అనామక దీన గాధలం..
దుఃఖం మా నిషానా
చీకటి మా చిరునామా
మేమే.. నపుంసకులం
థర్డ్ జెండర్.. కొజ్జాలం
ఈ విశాల దేశంలో
అడుగడుగునా…
వేదింపు వలపోత తప్పా
ఆత్మీయ పిలుపు దూరం
వివక్ష ఉక్కపోత తప్పా
సమైక్య స్పర్శ అదృశ్యం
వెరసి హిజ్రాల బతుకు
గడియ గడియ గండం
ఆసాంతం అగ్ని గుండం
ఓ సభ్య సమాజమా !
కరుణించకున్న పర్లేదు
విద్వేష విషం చిమ్మొద్దు
ఆదరించకున్నా మానే
వివక్ష గునపం దించొద్దు
గౌరవించుకున్నా సరే
బతుక్కు చితి పేర్చొద్దు
జనగణమా ఇకనైనా
మనోనేత్రంతో వీక్షించి
ఈ అభాగ్య జీవులను
మనుషులుగా గుర్తించు
థర్డ్ జెండర్ ఆత్మ ఘోష ఆవిష్కరిస్తూ…)
– కోడిగూటి తిరుపతి, 9573929493