Take a fresh look at your lifestyle.

యాది..

‘‘పట్టు వదలని విక్రమార్కుడు చెట్టు వద్దకు’’……
సదివినోళ్ళందరు మీ ఇమానంగ జెప్పుండ్రి!మీకేం యాదికచ్చింది!?
గుండెలకేలి పాయిరంగ తీషిన యాది
విక్ర మార్కుని బొమ్మ!
కాదని యెవలన్న అంటరా!

image.png

కొందరు ఎంత మరిశిపొయినా యాదికుంటరు. కొందరు ఎంత యాదికుండాలని అనుకుంటె సుత యాదికుండరు.  బతికుండంగ జేషే పనులే గాళ్ళ యాదిని మన గుండెలల్ల పైలంగ దాషిపెడ్తది. శంకర్‌ అనే శివశంకరన్‌ ‘‘‌చందమామ’’ పిలగాండ్ల బొమ్మల పుస్తకం యాదికున్నంత కాలం మన గుండెలల్ల నిలిషిపోయే గొప్ప మనిషి. ఏడందల భేతాళ కతలకు బొమ్మలేషి చందమామను మబ్బుల్ల ఎలుగు లాగ మెరిపిచ్చిండు. అసోంటి మనిషి జీవిడిండని తెలిషినంక అయ్యో! అని బాద పడి గుడ్లల్ల నీళ్ళుతీసుకోని  తెలుగోళ్ళు లేరు. చందమామను మన గుండెల గంతగనం పైలంగ దాషిపెట్టింది అండ్ల కానచ్చే బొమ్మలేనాయె!గవి గీషే టీవీ ఆచార్య, చిత్రా,వడ్డాది పాపయ్య, శంకర్‌ ‌సార్లల్ల ఈ కాలం దాంక మనతోటి  మిగిలింది శంకర్‌ ‌సార్‌ ఒక్కలే! ఆయన సుత మనకు దూరమయిండు. శంకర్‌ ‌సారు గురించి ఒక్క ముక్కల జెప్పాలంటె ఒక్క విక్రమార్కుని బొమ్మ సాలు.

శంకర్‌ ‌సారు కుంచె ఎసొంటి సొగసులు బూషి చందమామను అందాల చందమామ జేషేదో చెప్పటందుకు ఓ పాత చందమామ ముంగ టేసుకుంటె సాలు. రామాయణం, మహాబారతం కత లకు రాముడు,కృష్ణుడు దేవుల్ల బొమ్మలు గీత్తె గా బొమ్మల్ని ఇంట్ల దేవుని గూట్లె అతుకుబెట్టుకునెటోళ్ళు.మొక్కి ఆరతులిచ్చెటోళ్ళు. కోరలు కొమ్ముల తోని రాచ్చసుల బొమ్మలు గీషినా,సొట్ట బుగ్గల హంస నడకల రాజకుమారి బొమ్మలు గీషినా పాణం వున్నాయా!యేందని పిచ్చేది! రావణాసురుడు,కుంబకర్ణుడుబొమ్మలైతే కండ్ల ముందు నుంచి తీషేదే లేదు.అంత అవ్వల్‌ ‌దర్జా బొమ్మలేషి ఒక తరాన్ని పల్కరిచ్చి ఇంకో పదిరువై తరా దాంక యాది మర్వకుంట చందమామ బొమ్మలల్ల కనబడుకుంట మనల్ని పల్కరిచ్చుకుంట మన యాదిల వుంటడు. శంకర్‌ ‌సార్‌ ఎక్కడున్నా మరిషిపోలేని గొప్పబొమ్మ….దునియా మొత్తంల పిలగాండ్ల చందమామ పెద్దోళ్ళం సుత పడిపడి సదివేతీర్గ జేషి,ఇంకా యాది మర్వకుంట మన గుండెల్ల దాషిన శంకర్‌ ‌సారుకు శెనార్తులు!
శంకర్‌ ‌సారు నుంచి క్షమాపణలు కోరుతూ…..
– ఎలమంద. తెలంగాణ

Get real time updates directly on you device, subscribe now.

Leave a Reply