Take a fresh look at your lifestyle.

బ్యాంకులు నిర్లక్ష్యంగా వ్యవహరిస్తున్నా పట్టించుకోని ప్రభుత్వం

రైతులకు రుణమాఫీ చేయకపోవడంతో బ్యాంకులు కొత్త అప్పు ఇవ్వడం లేదు
టిఆర్‌ఎస్‌కు రానున్న రోజుల్లో ప్రజలే బుద్ధి చెబుతారు
బిజెపి సీనియర్‌ ‌లీడర్‌ ‌‌విజయశాంతి

రాష్ట్రంలో రైతుల కోసం ఎన్నో పథకాలను తీసుకొచ్చామనీ, రైతుల అభివృద్ధికి కృషి చేస్తున్నామనీ టీఆర్‌ఎస్‌ ‌పార్టీ ప్రభుత్వం ప్రచారం చేసుకుంటున్నా…రాష్ట్రంలో రైతుల ఆత్మహత్యలు మాత్రం కొనసాగుతున్నాయని బిజెపి సీనియర్‌ ‌లీడర్‌, ‌మాజీ ఎంపి, ప్రముఖ సినీనటి విజయశాంతి అలియాస్‌ ‌రాములమ్మ అన్నారు. రైతులకు పంట రుణాలు ఇవ్వడంలో బ్యాంకులు తీవ్ర నిర్లక్ష్యంగా వ్యవహరిస్తున్నా ప్రభుత్వం పట్టించుకోవడం లేదనీ ఆమె మండిపడ్డారు. టిఆర్‌ఎస్‌ ‌పార్టీ సర్కార్‌ ‌తీరుపై ఆమె తనదైనశైలిలో ఫైర్‌ అయ్యారు. బుధవారం ఆమె సోషల్‌ ‌మీడియా ద్వారా ఓ పోస్టు చేస్తూ…2011-12 ఆర్థిక సంవత్సరంలో తెలంగాణ ప్రాంతంలో బ్యాంకులు తాము నిర్దేశించుకున్న లక్ష్యానికి మించి 115 శాతం పంట రుణాలు ఇచ్చాయి. ఆ ఏడాది రూ.10,233 కోట్లు ఇవ్వాలనేది లక్ష్యం కాగా…రూ. 11,787 కోట్లు ఇచ్చాయి. ఇక 2012-13లో ఏకంగా 121 శాతం, 2013-14లో 103 శాతం ఇచ్చాయి. అయితే, తెలంగాణ ఏర్పాటయ్యాక 2014-15లో పంట రుణాల లక్ష్యంలో 93 శాతమే ఇచ్చాయి.

అలా క్రమంగా రుణాల మంజూరు తగ్గిస్తూ వొస్తున్నా ప్రభుత్వం ఎలాంటి చర్యలు తీసుకోకుండా కేవలం రైతు బంధు ఇస్తున్నామన్న సాకుతో రైతులకు పెట్టుబడి కొరకు బ్యాంకు రుణాల మంజూరుకు ఎలాంటి సూచనలు చేయలేదన్నారు.  దీంతో ఈ  వానాకాలం సీజన్‌లో రైతులకు రుణాలు ఇవ్వడానికి బ్యాంకులు ముందుకు రాకపోవడంతో రైతులు గత్యంతరం లేక ప్రయివేటు వడ్డీ వ్యాపారస్థుల వద్ద అప్పులు చేయాల్సిన పరిస్థితి దాపురించిందన్నారు. బ్యాంకుల తీరును ఎప్పటికప్పుడు సమీక్షించి పరిస్థితిని చక్కదిద్దాల్సిన ప్రభుత్వం, వ్యవసాయశాఖ యంత్రాంగం చూసీచూడనట్లు వ్యవహరిస్తుండటం చూస్తుంటే రైతుల పట్ల తమకున్న వైఖరి అర్దమవుతుందన్నారు. ఈ వానాకాలం పంటల సాధారణ సాగు విస్తీర్ణం 1.16 కోట్ల ఎకరాలు కాగా, 1.19 కోట్ల ఎకరాల్లో పంటలు సాగయ్యాయి. అందులో వరి 61.94 లక్షల ఎకరాల్లో సాగైంది. సాధారణం కంటే వరి ఏకంగా 182 శాతం సాగైంది.

 

వాస్తవంగా వరి రైతులే ఎక్కువగా రుణాలు తీసుకుంటారు. అయితే వరి సాగైనంత స్థాయిలో బ్యాంకులు రుణాలు ఇవ్వకపోవడం గమనార్హం. ఇక పత్తి 46.42 లక్షల ఎకరాల్లో, కంది 7.64 లక్షల ఎకరాల్లో సాగైంది. కానీ, పంట పెట్టుబడికి బ్యాంకులు ఇప్పటివరకు 43.45శాతం మేరకే రుణాలు ఇచ్చాయంటే బ్యాంకుల తీరుకు ప్రభుత్వ వైఖరే కారణమని స్పష్టంగా అర్ధమవుతుంది. 2018 ఎన్నికలప్పుడు లక్ష లోపు పంట రుణాలు మాఫీ చేస్తామని చెప్పి రుణమాఫీ చేయకపోవడంతో….ఉన్న అప్పు తీరక, కొత్త అప్పు ఇవ్వడానికి బ్యాంకులు ముందడుగు వేయడం లేదన్నారు. ప్రభుత్వం చేసిన తప్పిదాలకు నేడు తెలంగాణ రైతాంగం నిస్సహాయ పరిస్థితుల్లో ప్రయివేట్‌ ‌వడ్డీ వ్యాపారస్థుల వద్ద అప్పులు చేశారు. ఒక అంచనా ప్రకారం రూ.5 వేల కోట్ల ప్రయివేట్‌ అప్పులు చేసినట్లు అంచనా ఉండగా…మరీ ముఖ్యంగా రైతుబంధుకు కానీ, బ్యాంకు రుణాలకు కానీ నోచుకోని కౌలు రైతుల పరిస్థితి మరింత ఘోరంగా ఉందన్నారు వీరికి ప్రయివేట్‌ ‌రుణాలు తప్ప మరో ఆధారం లేదు. దీంతో పెట్టుబడి వ్యయం తలకు మించిన భారంగా మారి చేసిన అప్పులు తీర్చలేక ఉరికొయ్యలకు వేళాడుతున్నా వీరి చావులు ప్రభుత్వానికి కనబడుటలేదన్నారు రైతులు ఆత్మహత్యలకు  పాల్పడుతుంటే పట్టింపులేనట్టుగా వ్యవహరిస్తున్న టిఆర్‌ఎస్‌ ‌సర్కార్‌కు రానున్న ఎన్నికల్లో యావత్‌ ‌తెలంగాణ ప్రజానీకం తగిన బుద్ది చెబుతుందనీ విజయశాంతి హెచ్చరించారు.

Leave a Reply