Take a fresh look at your lifestyle.

వేయి స్తంభాల గుడి, రామ‌ప్ప దేవాల‌యాల పున‌రుద్ధ‌ర‌ణ‌, సమ‌గ్ర అభివృద్ధి..!

  • సహాయం చేయండి ..కేంద్రాన్ని కోరిన తెలంగాణ ఎంపీలు
  • కేంద్ర ప‌ర్యాట‌క శాఖ మంత్రి ప్ర‌హ్లాద్ సింగ్ ప‌టేల్ కు వినతి పత్రం

ప్రజాతంత్ర ప్రత్యేక ప్రతినిధి ,న్యూ దిల్లీ ,మార్చి 24: వేయి స్తంభాల గుడి, రామ‌ప్ప దేవాల‌యాల పున‌రుద్ధ‌ర‌ణ‌, సమ‌గ్ర అభివృద్ధికి కేంద్రం సహాయం కోరుతూ కేంద్ర ప‌ర్యాట‌క శాఖ మంత్రి ప్ర‌హ్లాద్ సింగ్ ప‌టేల్ ను ఎంపీలు జోగినపల్లి సంతోష్ కుమార్ , బండ ప్రకాష్ , మాలోత్ కవితలతో కలిసి ఎమ్మెల్సీ పోచంప‌ల్లి శ్రీ‌నివాస్ రెడ్డి వినతి పత్రం అందజేశారు.. కాకతీయుల కళలకు కాణాచిగా ప్రసిద్ధి గాంచిన చారిత్రక ఆలయాలు వెయ్యి స్తంభాల గుడి, రామప్ప దేవాలయాల్లో చేప‌ట్టిన సమగ్ర అభివృద్ధి, పునరుద్ధరణ పనులను సకాలంలో పూర్తి చేయాలని కోరుతూ కేంద్ర పర్యాటక శాఖ మంత్రి ప్రహ్లాద్ సింగ్ పటేల్ కి ఎమ్మెల్సీ పోచంపల్లి శ్రీనివాస్ రెడ్డి వినతి పత్రాన్ని ఇచ్చారు.

కాకతీయులు ఆనాటి తమ రాజధాని, నేటి వ‌రంగ‌ల్ జిల్లా నడిబొడ్డున వెయ్యి స్తంభాల గుడి కటించారు. స్వ‌ర్ణ‌యుగంగా పేరుగాంచిన కాక‌తీయుల కాలంలో అత్యంత్త‌మంగా నిర్మించిన దేవాల‌యాల్లో ఒక‌టిగా పేరొందినది. ఈ ఆలయంలోని నక్షత్ర ఆకారంలో వాస్తుశిల్పం అద్భుతమైన హస్త కళాకారుల నైపుణ్యానికి సాక్ష్యంగా నిలుస్తున్న‌ది. ఆలయానికి చెక్కిన రాతి స్తంభాలు ఆనాటి క‌ళా వైభ‌వాన్ని నేటికీ చాటుతూ ఉన్నాయి అని లేఖ‌లో రాసారు. చారిత్రక ఆధారాల ప్రకారం, కాకతీయ రాజు రుద్రదేవుడి ఆదేశాల మేరకు క్రీ.శ 1175–1324 మధ్య వెయ్యి స్తంభాల ఆలయం నిర్మించబడింది. కళాఖండంగా ఉన్న ఈ ఆలోయాన్ని విష్ణు, శివుడు, సూర్య హిందూ దేవతలకు అంకితం చేయబడిన‌దిగా ప్రసిద్ధి గాంచినది.

శాండ్ ‌బాక్స్ పద్ధతిని ఉపయోగించి 1000 స్తంభాల ఆలయ పునాదులు వేశారు. ఈ కాక‌తీయ యుగపు శిల్ప చాతుర్యానికి మ‌చ్చు తున‌క‌ అయిన ఈ కళాకాండం 800 సంవత్సరాలకు పైగా చెక్కుచెదరకుండా ఉన్నప్పటికీ, ఒక‌టి రెండు స్తంభాలు ఒరిగిపోయిన కార‌ణంగా, ఆలయానికి దక్షిణాన ఉన్న ‘నాట్య మండపం’ పునర్నిర్మాణం కోసం 2005 లో భారత పురావస్తు శాఖ దేవాల‌య స్తంభాల‌ను తొల‌గించివేసింది. అయితే, పునరుద్ధరణ పనులు నిరుత్సాహంగా తాత్సారంతో జరుగుతున్నాయి అని 18 నెలల్లోపు పూర్తి చేయాల్సిన పునర్నిర్మాణం ఇంకా దశాబ్దం గడిచినా ఇంకా పూర్తి కాలేదు అని మంత్రి దృష్టికి తెచ్చారు. ఈ పనులను వెంట‌నే పూర్తి చేయాల‌ని కేంద్ర మంత్రికి ఎమ్మెల్సీ పోచంప‌ల్లి శ్రీ‌నివాస్ రెడ్డి విజ్ఞ‌ప్తి చేశారు.

అలాగే రామప్ప ఆలయ సముదాయ సమగ్ర అభివృద్ధికి కూడా విజ్ఞప్తి చేసారు.వరంగల్ నగరానికి 77 కిలో మీటర్ల దూరంలో ఉన్న ప్రపంచ ప్రఖ్యాతిగాంచిన రామప్ప ఆలయం ఒక శాసనం క్రీ.శ 1213 నాటిదని, కాకతీయ పాలకుడు గణపతి దేవ కాలంలో దీనిని జనరల్ రేచెర్ల రుద్రారెడ్డి నిర్మించారని శ్రీ‌నివాస్ రెడ్డి మంత్రి దృష్టికి తెచ్చారు . 2019లో ఈ ఆలయం ప్రతిపాదిత యునెస్కో ప్రపంచ వారసత్వ ప్రదేశం “ది గ్లోరియస్ కాకతీయ దేవాలయాలు, గేట్వేలు” లో “తాత్కాలిక జాబితాలో” చేర్చబడింది. ప్రసిద్ధ యాత్రికుడు మార్కో పోలో కాకతీయ సామ్రాజ్యాన్ని సందర్శించినప్పుడు, ఈ ఆలయాన్ని “దేవాలయాల గెలాక్సీలో ప్రకాశవంతమైన నక్షత్రం” అని పిలిచాడు. గర్భగుడి ముందు ఉన్న హాలులో అనేక చెక్కిన స్తంభాలు ఉన్నాయి.

ఈ ఆలయాన్ని రామప్ప అనే శిల్పి చెక్కారు. భారతదేశంలో శిల్పి పేరుమీద ఉన్న ఏకైక రామప్ప ఆలయం ఇది అని పోచంప‌ల్లి శ్రీ‌నివాస్ రెడ్డి తన లేఖ‌లో వివ‌రించారు. ప్రధాన నిర్మాణం ఎర్రటి ఇసుకరాయిలో ఉంది, కాని వెలుపల ఉన్న స్తంభాలలో ఇనుము, మెగ్నీషియం, సిలికా అధికంగా ఉండే నల్ల బసాల్ట్ మెటల్ పెద్ద బ్రాకెట్లు ఉన్నాయి. వీటిపై పౌరాణిక జంతువులు, నృత్యకారులు, సంగీతకారుల చిత్రాలు చెక్కారు. “కాకతీయ కళాఖండాలు, వాటి సున్నిత శిల్పం, ఇంద్రీయ భంగిమలు ఎంతో ప్ర‌సిద్ధి పొందాయి. అని ఎమ్మెల్సీ శ్రీ‌నివాస్ రెడ్డి మంత్రికి తెలిపారు.

యుద్ధాలు, ప్రకృతి వైపరీత్యాలు, దోపిడీ, విధ్వంసాల‌ను త‌ట్టుకుని ఈ ఆలయం ఇంకా చెక్కుచెదరకుండా ఉంది. 17వ శతాబ్దంలో సంభవించిన భూకంపం స‌మ‌యంలో పాక్షిక న‌ష్టం వాటిల్లింది. కొన్ని నిర్మాణాలు నిర్లక్ష్యానికి గురై శిథిలావస్థకు చేరాయి. కుడి వైపున ఉన్న కామేశ్వర ఆలయం కూల్చివేయబడింది. ఆలయ బయటి గోడలోని ప్రధాన ప్రవేశ ద్వారం కూడా పాడైపోయింది. ఈ ద‌శ‌లో రామ‌ప్ప దేవాల‌య పున‌రుద్ధ‌ర‌ణ జ‌ర‌గాల్సి ఉంది. వేయి స్తంభాల ఆల‌యాన్ని సాధ్య‌మైనంత వేగంగా పున‌రుద్ధ‌రించాల‌ని, రామ‌ప్ప దేవాల‌య స‌మ‌గ్ర అభివృద్ధికి పాటు ప‌డాల‌ని కేంద్ర ప‌ర్యాట‌క‌ మంత్రికి రాష్ట్ర ఎమ్మెల్సీ పోచంప‌ల్లి శ్రీ‌నివాస్ రెడ్డి విజ్ఞ‌ప్తి చేశారు.

Leave a Reply