Take a fresh look at your lifestyle.

దేశ ప్రగతిలో కలెక్టర్ల పాత్ర కీలకం

  • స్థానిక యంత్రాంగం జట్టుగా పని చేస్తేనే సత్ఫలితాలు
  • అభ్యుదయకాంక్ష ఉన్న అధికారులు చరిత్ర సృష్టిస్తున్నారు
  • కలెక్టర్లతో వీడియో కాన్ఫరెన్స్‌లో ప్రధాని మోడీ

న్యూ దిల్లీ, జనవరి 22 : దేశాన్ని ప్రగతి పథంలో నడిపించేందుకు గల అడ్డంకులను అభ్యుదయ కాంక్షగల జిల్లాలు తొలగిస్తున్నాయని ప్రధాన మంత్రి నరేంద్ర మోదీ శనివారం ప్రశంసించారు. సుపరిపాలనకు జిల్లా యంత్రాంగం చాలా అవసరమని చెప్తూ, పథకాలను మెరుగ్గా అమలు చేయడానికి జిల్లా యంత్రాంగం దోహదపడుతుందన్నారు. క్షేత్ర స్థాయి సందర్శన, తనిఖీలకు సవివరమైన మార్గదర్శకాలను రూపొందించాలని అధికారులను ఆదేశించారు. ముఖ్యమైన ప్రభుత్వ పథకాలను అమలు చేయడంపై దేశవ్యాప్తంగా ఉన్న జిల్లా కలెక్టర్లతో వీడియో కాన్ఫరెన్స్ ‌ద్వారా ఆయన మాట్లాడారు. కేంద్ర, రాష్ట్ర ప్రభుత్వాలు, స్థానిక యంత్రాంగం కలిసికట్టుగా ఓ జట్టుగా పని చేస్తుండటం వల్ల ఈ జిల్లాల్లో సత్ఫలితాలు వొస్తున్నాయన్నారు. ఇతరుల ఆకాంక్షలు మన సొంత ఆకాంక్షలు అయినపుడు, ఇతరుల కలలు నెరవేరడం మన విజయానికి కొలమానం అయినపుడు, ఆ కర్తవ్య మార్గం చరిత్రను సృష్టిస్తుందని చెప్పారు. నేడు అభ్యుదయ కాంక్షగల జిల్లాల్లో ఈ చరిత్రను సృష్టిస్తుండటం మనం చూస్తున్నామన్నారు. పై స్థాయి నుంచి క్రింది స్థాయికి, అదేవిధంగా క్రింది స్థాయి నుంచి పై స్థాయి వరకు పరిపాలన పక్రియ సజావుగా జరగడం కోసం పాలనా యంత్రాంగం, ప్రజల మధ్య ప్రత్యక్ష, మానసిక అనుబంధం ఉండాలని పిలుపునిచ్చారు.

అభ్యుదయ కాంక్షగల జిల్లాల్లో మన దేశం సాధిస్తున్న విజయాలకు ప్రధాన కారణం ఏకాభిముఖత, కేంద్రీకరణ అని తెలిపారు. అవే వనరులు, అదే ప్రభుత్వ యంత్రాంగం, ఆ అధికారులే అయినప్పటికీ ఫలితం మాత్రం విభిన్నంగా ఉందన్నారు. ఉద్యోగంలో చేరిన మొదటి రోజు ఎలాంటి ఉత్సాహంతో ఉన్నారో అదే ఉత్సాహంతో దేశ కోసం సివిల్‌ ‌సర్వెంట్లు పని చేయాలని పిలుపునిచ్చారు. అభ్యదయ కాంక్షగల ప్రతి జిల్లాలోనూ గడచిన నాలుగేళ్ళలో జన్‌ ‌ధన్‌ ‌ఖాతాలు నాలుగు నుంచి ఐదు రెట్లు పెరిగాయన్నారు. దాదాపు ప్రతి కుటుంబానికి ఓ మరుగుదొడ్డి ఉందన్నారు. ప్రతి గ్రామంలోనూ విద్యుదీకరణ జరిగిందన్నారు.

పేదల ఇళ్ళకు విద్యుత్తు చేరడం మాత్రమే కాకుండా ప్రజల జీవితాల్లో శక్తిని నింపిందన్నారు. దేశ వృద్ధిలో ఇవి కీలకంగా మారాయని తెలిపారు. కలెక్టర్ల అందరి కృషితో ఆశావహ జిల్లాలు ఆటంకాలకు బదులు అభివృద్ధి పథంలో దూసుకుపోతున్నాయని, మెరుగైన పరిపాలనకు సాంకేతికత, ఆవిష్కరణలు చాలా ముఖ్యమని ప్రధాని నరేంద్ర మోదీ అన్నారు. ఆశావహ జిల్లాల్లో పనిచేస్తున్న కలెక్టర్లు వారి జీవితాలు అభివృద్ధి చెందడం చూసి ఎంతో ఆనందంగా ఉన్నారని మోదీ అన్నారు. కలెక్టర్లు ఇతర జిల్లాల విజయాల నుంచి పాఠాలు నేర్చుకోవాలని సూచించారు. అలానే భవిష్యత్తులో వొచ్చే సవాళ్లను కూడా అంచనా వేయాలన్నారు.

Leave a Reply