Take a fresh look at your lifestyle.

చినుకు పడితే.. నగరం వణుకుతుంది.. ఏజెన్సీ ఏడుస్తుంది..!

“నగరీకరణ, పట్టణీకరణలో నిబంధనలను తుంగలో తొక్కి భూ ఆక్రమణలు చేసి ఆకాశహార్మ్యాల నిర్మాణం రియల్‌ ఎస్టేట్‌ ‌దందాలతో నియమ నిబంధనలు పాటించకుండా నిర్మాణాలు చేయడం వలన వర్షపు నీరు, మురుగు నీరు జన నివాసాలకు వస్తున్నాయి. ఆటంకం లేకుండా ప్రయాణించేలా చేయాలి. నగరాలు, పట్టణాలు చిన్నపాటి వర్షానికే ముంపుకు గురికావడం, పడవల్లో వెళ్లాల్సి రావడం లాంటి ప్రజల కష్టాలకు ముమ్మాటికి పాలకుల, అధికారుల, నిపుణుల నిర్వహణలోపమే కారణం.”

వర్షాకాలం వస్తుంది పోతుంది. ప్రజల సమస్యలు ఎప్పటికప్పుడు పెరిగిపోతున్నాయి కానీ, తగ్గడంలేదు. సాంకేతిక నిపుణులు, పాలకులు గతంలో సంభవించిన జల విలయం నుండైనా గుణపాఠం నేర్చుకోకపోగా, చేసిన తప్పులే చేస్తూ కాలం వెల్లదీస్తున్నారు. ప్రజలకు కష్టాలు మాత్రం రెట్టింపు అవుతున్నాయి. ప్రజాధనం మాత్రం కరి మింగిన వెలగపండోలే మాయమైపోతుంది. అభివృద్ధికి నిలయమైన మహానగరాలు, పట్టణాలు చినుకు పడిందంటే చిత్తడై దుర్గంద భరితమై పోతున్నాయి. రోడ్లు, కాలనీలు జలమయమై పోయి రహదారులు కొట్టుకుపోవడాలు, మురికి నీరు రోడ్లపైకి రావడం, ఎక్కడికక్కడే జనజీవనానికి ఆటంకం జరిగిపోతుంది. నగరాలు, పట్టణాల్లో పడవలపై లోతట్టు ప్రాంత ప్రజలను సురక్షిత ప్రాంతాలకు తరలించడం, కొన్ని ప్రాంతాల్లో వారి నివాసాల పై అంతస్తుల్లో రాత్రిం•వళ్లు ఊపిరిబిగపట్టుకొని రోజుల తరబడి నీరు వెళ్ళే వరకు ఇబ్బందులు పడుచున్నారు.

ఇలా కొన్ని రోజుల పాటు నీటమునిగిన ప్రాంతాలకు విద్యుత్తు సౌకర్యాలు, తాగునీటి సౌకర్యాలతోపాటు కనీస అవసరాలు తీరకపోగా, సాధారణ స్థితికి రావడానికి వారాలు, నెలలకొద్ది పడుచున్నది. ఈలోగా అనారోగ్య సమస్యలు వెరిసి ప్రజాజీవనానికి ఆటంకం జరగడం సర్వసాధారణమై పోతుంది. పాలకులు, ప్రతి పక్షాలు పరామర్శలు, విమర్శలు చేసి అధికారులపై విరుచుకు బడి చేతులు దులుపుకుంటున్నారు. ప్రజా సమస్యలను గాలికొదిలేసి మీడియాముందు ఒకరిపై ఒకరు నీవు దొంగ అంటే నీవే దొంగ అని విమర్శించుకొంటున్నారు. ఆ తరువాత గుట్టుచాటుగా పర్సంటేజీలు పంచుకోవడం, ఓట్లను వంతుల వారీగా దండుకొని అధికార పీఠాన్ని చేజిక్కించుకొని వంచిస్తున్నారని ప్రజలు భావిస్తున్నారు. ఆ తర్వాత ఎక్కడ వేసిన గొంగళి అక్కడే అన్న చందంగా మారుతుంది. మహానగరాలు, నగరాలు, పట్టణాలు అభివృద్ధికి ఆనవాలమైన చోటనే ఇలా జరుగుతుందంటే ? వర్షపు నీరు, మురుగునీరును సక్రమంగా, ఆధునిక సాంకేతిక పద్ధతుల్లో ప్రణాళిక బద్ధంగా నిర్వహణ జరగడం లేదనేది కాదనలేని నిజం.

నాలాల ఆక్రమణ, వర్షపునీరును నిలువచేసే చెరువులు, కుంటలు, ప్రవాహయోగ్యమైన వాగులు, నదులను ఆక్రమించి నిర్మాణాలు చేయడమే ఈ దుస్థితికి ప్రధాన కారణం. నగరీకరణ, పట్టణీకరణలో నిబంధనలను తుంగలో తొక్కి భూ ఆక్రమణలు చేసి ఆకాశహార్మ్యాల నిర్మాణం రియల్‌ ఎస్టేట్‌ ‌దందాలతో నియమ నిబంధనలు పాటించకుండా నిర్మాణాలు చేయడం వలన వర్షపు నీరు, మురుగు నీరు జన నివాసాలకు వస్తున్నాయి. ఆటంకం లేకుండా ప్రయాణించేలా చేయాలి. నగరాలు, పట్టణాలు చిన్నపాటి వర్షానికే ముంపుకు గురికావడం, పడవల్లో వెళ్లాల్సి రావడం లాంటి ప్రజల కష్టాలకు ముమ్మాటికి పాలకుల, అధికారుల, నిపుణుల నిర్వహణలోపమే కారణం. నగరపాలక, పట్టణపాలక సంస్థలు, ప్రభుత్వాలు ప్రజలను కష్టాల భారినుండి కాపాడుట కోసం వెంటనే నాలాల ఆక్రమణ, చెరువుల ఆక్రమణలు చేధించి మురుగునీరు, వర్షపునీరు జన నివాసాలకు రాకుండా భూమిలో ఇంకిపోయేలా చేసి భూగర్భజలం పెంచాలి. మురుగునీరుకు భూగర్బ •డ్రైనేజీ వ్యవస్థను ఏర్పరచి నిర్వహణ లోపాలను అధిగమించేలా నగర, పట్టణ ప్రజల కష్టాలను తీర్చి, క్రమబద్ధీకరించాలి. మహానగరాలు, ప్టణాల ప్రజల ఆరోగ్యాలు వర్షాకాలంతో పాటు కాలుష్యాలతో గాలిలో దీపంగా మారుచున్నాయి.

మన రాష్ట్రంలో దాదాపు 289 గ్రామీణ ఏజెన్సీ ప్రాంతాల ప్రజలు వర్షాకాలంలో పొంగిపొర్లుతున్న వాగులు, వంకల వలన ఊరుదాటి బయటకు వెళ్లలేని దుస్థితి. అలాగే బయటవారు గ్రామాలకు రాలేని పరిస్థితి కనిపిస్తుంది. ధైర్యంచేసి తాళ్ళను ఆ చివరకు, ఈ చివరకు బండరాళ్ళకు కట్టి నడవటంతో ప్రమాదవ శాత్తు మరణాలు సంభవిస్తున్నాయి. గ్రామీణ ఏజెన్సీ ప్రాంతాల్లో చెరువులు ఉదృతంగా ప్రవహిస్తున్నా. వ్యవసాయ పనులకు, కనీస అవసరాలకు గ్రామస్తులు ఎన్నో ఏళ్లుగా ఇలానే సాహసం చేయక తప్పడం లేదు. కాన్పు కోసం గర్భిణులను, అనారోగ్యంపాలైన వారిని ప్రధాన రహదారి దాకా కట్టెలకు కావడి కట్టుకొనో, ఎడ్లబండ్లపైననో వచ్చి దగ్గరి గ్రామాలకు తీసుకువెళ్ళుచున్నారు. ఈ గ్రామాల ప్రజలు వానాకాలం వచ్చిందంటే సీజన్‌ ‌జబ్బులకు తోడు రవాణా సౌకర్యాలు లేక కంటిమీద కునుకు లేకుండా జీవితం గడుపుతున్నారు. ఇలా ఆసిఫాబాద్‌, ‌నిర్మల్‌, ‌మంచిర్యాల, ఆదిలాబాద్‌, ‌జిల్లాల్లో ప్రతి వర్షాకాలంలో 137 గ్రామాలు జలదిగ్భంధానికి లోనౌతున్నాయి. మహబూబ్‌నగర్‌, ‌వనపర్తి, నాగర్‌కర్నూల్‌, ‌జోగులాంబ గద్వాల జిల్లాల్లో 32 గ్రామాల వాగులు ప్రజలకు ప్రాణసంకటంగా మారుతున్నాయి.

వరంగల్‌, ‌జయశంకర్‌ ‌భూపాలపల్లి, ములుగు, మహబూబాబాద్‌ ‌జిల్లాల్లో భారీ వర్షాలకు 55 గ్రామలలో ఏటా రాకపోకలు నిలిచిపోతున్నాయి. ఖమ్మం, భధ్రాద్రి కొత్తగూడెం జిల్లాల్లోని ఏజెన్సీ పరిదిలో 65 గ్రామాలు జలదిగ్భందంలో చిక్కుకొని వైద్యానికి, నిత్యావసరాలకు గిరిజనులు అవస్థలు పడుచున్నారు. ఐటిడిఏలు, పంచాయితీరాజ్‌, ‌రహదారులు, భవనాల శాఖలు ఆయా ప్రాంతాల్లో వంతెనల నిర్మాణం, మరమ్మత్తులు, రోడ్లను బాగు చేసేందుకు ప్రతి ఏటా ప్రతిపాదనలు పంపినా ! ఫలితం లేదు. కొన్నింటికి నిధులు వచ్చినా పనులు సాగడం లేదు. ఈ పరిస్థితికి గత పాలకులతో పాటు నేటి పాలకులకు బాధ్యత లేదా ! వెనువెంటనే ప్రస్తుత పరిస్థితులను గుర్తించి యుద్ధప్రాతిపదికన అటు మహానగరాలు, నగరాలు, పట్టణాలు, మరోవైపు సుమారు 300లకు పైగా ఏజెన్సీ గ్రామాల రహదారులు, వంతెనలు, కాజ్‌వేల, బండ్లబాటల నిర్మాణాలు, మరమ్మతులు చేస్తూ కనీస సౌకర్యాలను కల్పించాలి.

శాస్త్ర సాంకేతికంగా ఎంతో అభివృద్ధి చెంది రోదసీ యాత్రలు చేసివస్తున్నాము. ఉపగ్రహాలను ప్రయోగిస్తున్నాము. భూమండలంపై అణువణువు చూడగలుగుతున్న ఈ వేళ… అభివృద్ధి చెందని ఏజెన్సీ గ్రామాల్లో వర్షాకాలంలో కనీస అవసరాలు తీర్చుకోలేక ఊర్లకు ఊర్ల ప్రజలు నానా ఇబ్బందులు పడుచున్నారు. ఈ పరిస్థితి ఒక్కరోజులో వచ్చింది కాదు ? కాని నేటి పాలకులు వెంటనే స్పందించి ప్రతి వర్షాకాలంలో ఇదే పరిస్థితి పునరావృతం కాకుండా మహానగరాలు, నగరాలు, పట్టణాలను మరియు ఏజెన్సీ గ్రామాలను గుర్తించి ప్రణాళిక బద్ధంగా చిత్తశుద్ధితో అవినీతి లేకుండా సౌకర్యాలు కల్పించి వారి బాధలనుండి విముక్తి కల్పించాలి.
– మేకిరి దామోదర్‌, ‌వరంగల్‌
9573666650

Leave a Reply