కాటికి చేరిన ప్రాయం!
వయసు ఉన్నప్పుడు
ప్రణయం రాదు!
ప్రణయం వచ్చే వరకు
పరువం ఆగదు!
హేమంతంతో సంగమం
శిశిరంలో సాగితే!
వసంతంతో సమాగమం
ఉక్కపోతలో జోగితే!
సోయలన్నీ జారిపోతూ
సొబగులన్నీ జోలిపోతూ!
వలపులకు, తలపులకు
వియోగాలే మిగిలినవేళ!
- Advertisement -
చెరుపులకు, మరుపులకు
సంయోగాలే కలిగినవేళ!
సింగారాలకు సిగపట్లు చాలక
వయ్యారాలకు అగచాట్లు లేక!
ఊహలు పుట్టని ఊసుల్లో
కలలు రాని కునికిపాట్లులో!
విరహంతో దరహాసం
సరసంతో పరిహాసం!
కంచికి చేరని కథల్ని
మరో జన్మకు బదిలీ చేస్తూ!
మించి పోయిన తరుణాల్ని
మోసుకుపోతూ!
సమయం కన్ను గీటుతూ
వెక్కిరించింది!
ప్రాయాన్ని కాటికి తోస్తూ
ఫక్కుమంది!
– ఉషారం, 9553875577