Take a fresh look at your lifestyle.

భారతీయ గణిత చరిత్రకు వన్నెలద్దిన వాడు శ్రీనివాస రామానుజన్‌

సున్నాను కనిపెట్టి ప్రపంచ గణిత శాస్త్రానికి భారతీయులు అద్భుత కానుకను అందించారు. అప్పటి వరకు చుక్కానీ నావలా ప్రయాణిస్తోన్న గణితానికి సున్నా ఆవిష్కరణతో గొప్ప ప్రాధాన్యత సంతరిం చుకుంది. గణితశాస్త్ర అధ్యయనం భారతదేశంలో వేదకాలం నుంచే ప్రారంభమైంది. ప్రాచీన భారతీయులు గణితంలో ఎన్నో విషయాలు కనుగొన్నారు. సంఖ్యలను కనుగొనడంలో చాల కృషి చేశారు. దశాంశ పద్ధతిని గుర్తించిన మొదటివారు భారతీయులే. ఆర్యభట్ట కాలాన్ని భారతీయ గణితశాస్త్రానికి స్వర్ణయుగంగా పేర్కొంటారు. ఇది భాస్కరాచార్యుని వరకు ఆప్రతిహతంగా సాగింది. భాస్కరాచార్యుని తర్వాత కాలంలో బహుళ విదేశీ దండయాత్రల వల్ల గణితం కళా విహీనమైంది. అనువాదాలు, వ్యాఖ్యానాలు తప్ప పెద్దగా స్వతంత్ర గణిత సారస్వతం ఏదీ ఆవిష్కరణ కాలేదు. ఆ స్థితిలో మళ్లీ భారతీయ గణిత చరిత్రకు వన్నెలద్దిన వాడు శ్రీనివాస రామానుజన్‌.

అపారమైన మేధస్సుతో భారతదేశపు కీర్తిని ప్రపంచ గణిత శిఖరాలపై ఎగురవేసిన మేధావి శ్రీనివాస రామానుజన్‌. ‌తమిళనాడులోని ఉత్తర అర్కాట్‌ ‌జిల్లా ఈరోడ్‌లో ఒక నిరుపేద కుటుంబంలో 1887 డిసెంబర్‌ 22‌న జన్మించిన రామానుజన్‌ ‌పన్నెండేళ్ల వయసులోనే గణితంలో అసాధారణ బాలునిగా గుర్తింపు పొందారు. రామానుజన్‌ ‌బాల్యం నుంచి గణితం అంటే అభిరుచి కనబరుస్తూ తన ప్రతిభతో ఉపాధ్యాయుల ను ఆశ్చర్యపరిచేవాడు. అయితే ఆయన కేవలం గణితంపై మాత్రమే ఆసక్తి చూపేవాడు. ఇతర అంశాలలో అంతగా శ్రద్ధ పెట్టేవాడు కాదు. అందువల్ల ఇంటర్మీడియట్‌ ‌పరీక్షలో ఉత్తీర్ణుడు కాలేకపోయాడు.

Srinivasa Ramanujan was one of the pioneers of Indian mathematical history

ఒకసారి తరగతి గదిలో గణిత ఉపాధ్యాయుడు ఒక సంఖ్యను అదే సంఖ్యతో భాగిస్తే ఒకటి వస్తుందని చెప్పినప్పుడు ‘సున్నాను సున్నతో భాగించినప్పుడు ఒకటి ఎలా వస్తుంది?’ అని ప్రశ్నించాడు రామానుజన్‌. ‌పదో తరగతి చదివే రోజులలో బీజగణితం, త్రికోణమితి, కలన గణితం, వైశ్లేషిక రేఖాగణితం మొదలైన వాటిని అధ్యయనం చేశాడు. త్రికోణమితిని తన 12 సంవత్సరాల వయసులోనే పూర్తి చేశాడు. 15 ఏళ్లకే రామానుజన్‌ ‌గొప్పదనాన్ని ప్రపంచానికి చాటడానికి దోహదం చేసిన గ్రంథం జార్జ్ ‌స్కూచ్‌సిడ్జ్‌కార్‌ ‌రాసిన ‘సినాప్సిస్‌’. అం‌దులో దాదాపు 6165 సిద్ధాంతాలున్నాయి. 1903లో మద్రాసు విశ్వవిద్యాలయం నుంచి స్కాలర్‌ ‌షిప్‌ ‌పొందాడు. లెక్కల వల్ల కొడుకుకి పిచ్చిపడుతుందేమోనని భయపడిన రామానుజం తండ్రి ఆయనకు పెళ్ళి చేశారు. సంసారం గడవటం కోసం 25 రూపాయల వేతనం మీద రామానుజన్‌ ‌గుమాస్తాగా చేరారు. గణితంలో ఆయన ప్రదర్శిస్తున్న ప్రజ్ఞను చూచి ఏ డిగ్రీ లేకపోయినా మద్రాసు విశ్వవిద్యాలయం నెలకు రూ.75 ఫెలోషిప్‌ ‌మంజూరు చేసింది.

1913లో మద్రాస్‌ ‌పోర్ట్ ‌ట్రస్ట్‌కు వచ్చిన ప్రసిద్ధ గణిత శాస్త్రవేత్త డాక్టర్‌ ‌హకర్‌ ‌రామానుజన్‌ ‌పరిశోధనలు చూసి ఆశ్యర్యపోయి, రామానుజన్‌ ‌కనుగొన్న 120 పరిశోధనా సిద్ధాంతాలను ఆ కాలంలో ప్రసిద్ధుడైన కేంబ్రిడ్జి ప్రొఫెసర్‌ ‌గాడ్‌ ‌ఫ్రెహెరాల్డ్ ‌హార్టికి పంపారు. ఉన్నతస్థాయి గణితజ్ఞుడు రాయగల ఆ ఫలితాలను చూసి వెంటనే రామానుజన్‌ ‌ను కేంబ్రిడ్జి యూనివర్శిటీకి హార్టీ ఆహ్వానించారు. రామానుజన్‌లోని ప్రతిభను గుర్తించి ప్రోత్సహించిన హార్టీ అసలు తాను గణిత శాస్త్రానికి చేసిన అత్యుత్తమ సేవ రామానుజాన్ని కనుగొనడమే అని వ్యాఖ్యానించడం విశేషం. మార్చి 17, 1914న రామానుజన్‌ ఇం‌గ్లండుకు ప్రయాణమయ్యారు.

అక్కడి వాతావరణం సరిపడకపోవడం, విశ్రాంతిలేని పరిశోధనలు ఆయన ఆరోగ్యాన్ని దెబ్బతీశాయి. ఇలాంటి క్లిష్ట పరిస్థితుల్లో కూడా 32 పరిశోధనా పత్రాలను ఆయన సమర్పించారు. ఆరోగ్య పరిస్థితి విషమించడంతో 1919 మార్చిలో భారతదేశానికి తిరిగి వచ్చాడు. 33 ఏళ్ళకే ఆయన 1926, ఏప్రిల్‌ 26‌న పరమపదించారు. ఫిబ్రవరి 28, 1918లో ఫెలో ఆఫ్‌ ‌ద రాయల్‌ ‌సొసైటీ గౌరవం పొందిన రెండో భారతీయుడిగా, 1918 అక్టోబరులో ఫెలో ఆఫ్‌ ‌ద ట్రినిటీ కాలేజి గౌరవం పొందిన మొదటి భారతీయుడిగా రామానుజన్‌ ‌చరిత్రకెక్కాడు. రామానుజన్‌ ‌నోటు పుస్తకాలపై, గణిత సిద్ధాంతాలపై రామానుజన్‌ ఇనిస్టిట్యూట్‌లో, అమెరికాలోని ‘ఇలినాయిస్‌’ ‌యూనివర్సిటీలో నేటికీ రీసెర్చ్ ‌జరుగుతోంది. గణితశాస్త్రంలో ఆయన సేవలకు గుర్తింపుగా భారత ప్రభుత్వం ఆయన పుట్టినరోజును ‘జాతీయ గణితదినోత్సవం’గా ప్రకటించింది. శ్రీనివాస రామానుజన్‌ ‌సంఖ్య 1729 అని అంటారు. దీని ప్రత్యేకత ఏమిటంటే ప్రొఫెసర్‌ ‌హర్డీ టాక్సీ నెంబర్‌ 1729. ‌రామానుజన్‌ అనారోగ్యంగా ఉన్నప్పుడు పరామర్శించడానికి తన కారులో వెళ్లిన హార్టీకి 1729 యొక్క ప్రాముఖ్యతను వివరించారు. దానిని రెండు ఘనాల మొత్తంను చెప్పారు. అంతేకాదు రెండు రకాలుగా రాయగల మిక్కిలి చిన్న సంఖ్య అని గుర్తించిన మేధావి శ్రీనివాస రామానుజన్‌.

Leave a Reply