గగనానికి గాన గంధర్వుడు

పాటను పంచామృతంగా
ఆబాలగోపాలానికి రుచి చూపి
శత కోటి మనస్సులు దోచిన
నీ సుస్వర ఝరి అజరామరం !

ఆధునిక అన్నమయ్య
నేటి అపర నాటి త్యాగయ్య
భక్తి రాగాలకు భక్త రామదాసు
స్వరాలకు సరస్వతి పుత్రుడు !

‘శ్రీపతి’ దీవెనలు తోడై
‘పండితారాధ్యుల’ పాటగాడు
పిల్లల్లో తనో పసి ‘బాలు’డు
‘సుబ్రహ్మణ్యం’ భక్తిపరుడు !

అద్వైత సిద్ధికే కాదు
అమరత్వలబ్దికీ గానాన్ని
సోపానం చేసుకొని మనకిచ్చి
దివికేగెను గాన గంధర్వుడు !

మాటల మాంత్రికుడు
సహజత్వ నటశేఖరుడు
డబ్బింగుల్లో కంఠస్వరధీరుడు
సుస్వర సంగీతకారుడు !

నీ పాట అమ్మ ఒడి
నీ గానం నాన్న చేయి
నీ రాగం తెలుగు గుడి
నీ గాత్రం గుడి గంట !

బహుభాషా గానకోవిదుడు
భాషకే వన్నె తెచ్చిన ధీరుడు
తెలుగింటి పాటల తోరణం
భరతావనికే స్వరాభిషేకం !

నీ పాటకు మరణం లేదు
నీ రాగానికి విరామం లేదు
నీ వాక్కుకు తిరుగే లేదు
నీ నటనకు హద్దులు లేవు !

నీవే మా పాటకు ఊట
నీవే మా చెలిమి చెలిమె
నీవే మా భాష శ్వాస
నీవే మా రేపటి రాగం !

డా: బుర్ర మధుసూదన్‌ ‌రెడ్డి
విశ్రాంత ప్రధానాచార్యులు, ప్రభుత్వ డిగ్రీ పిజీ కళాశాల
కరీంనగర్‌ – 99497 00037