Take a fresh look at your lifestyle.

కరోనా కరువు కాలంలో చమురు భగ భగలు

ప్రపంచంలో ఏ దేశంలో లేని విధంగా మన దగ్గర పెట్రోల్‌, ‌డీజిల్‌పై 69 శాతం పన్నులు వసూలు చేస్తున్నారు. ప్రపంచంలో ఎన్నడూ లేని విధంగా క్రూడ్‌ ఆయిల్‌ ‌ధరలు 70 ఏండ్ల గరిష్టానికి పడిపోయినా ధరలు తగ్గక పోవడానికి పన్నులే ప్రధానం. 1946లో బారెల్‌ ‌ధర ఎంత ఉందో ప్రస్తుతం అంతకు పడి పోయిందని విశ్లేషకులు చెబుతున్నారు. ప్రస్తుతం అంతర్జాతీయ మార్కెట్‌లో బారెల్‌ ‌ధర 23 నుండి 24 డాలర్ల మధ్య ట్రేడ్‌ అవుతోంది. ప్రపంచంలో ఇతర దేశాలలో బారెల్‌ ‌హెచ్చుతగ్గులను బట్టి పెట్రోల్‌, ‌డీజిల్‌ ‌ధరలు తగ్గుతున్నాయి, కాని మన దేశంలో మాత్రం పెరిగితే పెంచుతున్నారు కాని తగ్గితే దించకుండా టాక్సులతో బాదేస్తున్నారు.

కరోనా లాక్‌ ‌డౌన్‌ ‌సంక్షోభంలో ప్రపంచమంతటా ఆయిల్‌ ‌ధరలు దిగివస్తే మన దేశంలో మాత్రం అందుకు భిన్నంగా పెరిగి కూర్చున్నాయి. కేంద్రం ఇటీవల రోడ్‌ ‌సెస్‌ ‌పేరిట డీజిల్‌ ‌రూ 13 , పెట్రోల్‌పై లీటరుకు రూ 10 చొప్పున పెంచింది. కేంద్రం పెంచిన ఎక్సైజ్‌ ‌డ్యూటీ, రాష్ట్రాలు పెంచిన వ్యాట్‌ ‌కారణంగా ఆయిల్‌ ‌ధరలు దిగి రావడం లేదు. మనకు పెరిగినట్లు కనిపించక పోయినా తగ్గాల్సిన ధరలు టాక్సుల కారణంగా తగ్గలేదని అర్థం చేసుకోవాలి.

ఢిల్లీ, ఉత్తర ప్రదేశ్‌, ‌రాజస్థాన్‌, ఒరిస్సా, అస్సాం, నాగాలాండ్‌లలో వ్యాట్‌ ‌పెంచారు. మరి కొన్ని రాష్ట్రాలు కోవిడ్‌ 19 ‌పేరు చెప్పి వ్యాట్‌ ‌పెంచేందుకు సిద్ధపడుతున్నాయి. ఇంటర్నేషనల్‌ ‌మార్కెట్లో క్రూడ్‌ ఆయిల్‌ ‌ధర 70ఏళ్ళ గరిష్ట స్థాయికి పడిపోయినా మన దేశంలో మాత్రం ఆయిల్‌ ‌ధరలు తగ్గక పోవడానికి కేంద్ర, రాష్ట్రాలు విధించే పన్నుల విధానాలే  ప్రధాన కారణం.

క్రూడ్‌ ఆయిల్‌ ‌బారెల్‌ ‌ధర ఠపాలున పడిపోయిందని ఇక  ఫ్రీగానే ఆయిల్‌ ‌లభిస్తుందని జోకులు పేల్చుకున్నాం. కాని మోదీ సర్కార్‌ ‌కరోనా కల్లోలంలో కాసుల వేటే ప్రధానంగా ధరలు పెంచి మన జోకులను కూడ పేలకుండా పేలవం చేసింది. దీనికి తోడు కొన్ని రాష్ట్రాలలో మేమేం తక్కువ కాదంటూ వాట్‌ ‌పెంచేశారు. ఒకటి రెండు రాష్ట్రాలే ప్రస్తుతం ఈ వ్యాట్‌ ‌పెంచినా మిగతా రాష్ట్రాలన్ని వ్యాట్‌ ‌పెంచి ఇదే బాటను అనుసరించడం ఖాయం. ఎందుకంటే దేశంలో అన్ని రాష్ట్రాలలో  కరోనా గడబిడ ఇంకా కొనసాగుతూనే ఉంది. ఈ గడబిడ ఎప్పుడు ముగుస్తుందో తెలియదు. కరోనా వ్యవహారంలో అమీ తుమీ తేలే వరకు లాక్‌ ‌డౌన్‌ ‌తప్పుదు. అన్నిం రంగాలు సడ్డమాలి పోయాయి. పరిశ్రమలైతే పూర్తిగా ఖాయిలా పడిపోయాయి.  స్తంభించి పోయిన ఆర్థికంలో  రాష్ట్ర ప్రభుత్వాలు పూట గడవక ఉద్యోగులకు పూర్తి స్థాయి వేతనాలు ఇవ్వలేక కోతలు పెట్టాయి.  ఆదుకోవలంటూ మోదీ సర్కార్‌తో మొర పెట్టుకున్నా ఆశించిన మేరకు సాయం లభించలేదని రాష్ట్రాలు అరుపులు పెడ బొబ్బలు పెడుతున్నాయి. ఓ రకంగా చెప్పాలంటే దిక్కు తోచని స్థితిలో రాష్ట్రాలు ఉన్నాయి. రాష్ట్రాలు కూడ ఎడ పెడా వాయించేందుకు సిద్ధపడుతున్నాయి. కొన్ని రాష్ట్రాలలో ప్రధాన ఆదాయ వనరుల్లో ఒకటైన మద్యం ధరలు విపరీతంగా పెంచారు. కరోనా కరవు పేరిట ఇతరత్రా ఆదాయ మార్గాలను వెదుకుతున్నాయి. పెట్రోల్‌, ‌డీజిల్‌ ‌ధరల పెరుగుదల విషయంలో రాష్ట్రాలేం తక్కువ కాదు. పెట్రోల్‌పై 36 శాతం, డిజిల్‌పై 27 శాతం వ్యాట్‌ ‌పేరిట బాదుతున్నాయి. డీజిల్‌పై ఒక శాతం, పెట్రోల్‌పై 2 శాతం వ్యాట్‌ను రాజస్థాన్‌ , ఉత్తర ప్రదేశ్‌ ‌రాష్ట్రాలు పెంచాయి. డిల్లీలో డిజీల్‌పై వ్యాట్‌ ‌డబుల్‌ ‌చేశారు. ఇది వరకు డీజిల్‌పై 16.75 శాతం, పెట్రోల్‌పై 27శాతం ఉండగా ప్రస్తుతం కేజ్రీవాల్‌ ‌సర్కార్‌ ‌రెండింటిని 30శాతం చేసింది. తెలంగాణ, తమిళనాడు రాష్ట్రాలు కూడ అధికంగా వ్యాట్‌ ‌పేరిట ఇప్పటికే బాదేస్తున్నాయి. తెలంగాణలో పెట్రోల్‌పై 35.20, డీజిల్‌పై 27శాతం వ్యాట్‌ ఉం‌ది.

తమిళనాడులో పెట్రోల్‌పై 34 శాతం, డిజిల్‌పై 24 శాతం ఉంది. ఈ రాష్ట్రాలు కూడ మిగతా రాష్ట్రాలు చూపిన రాస్తా తొక్కితే ఎంత పెరగవచ్చో ఊహించవచ్చు.ప్రపంచంలో ఏ దేశంలో లేని విధంగా మన దగ్గర పెట్రోల్‌, ‌డీజిల్‌పై 69 శాతం పన్నులు వసూలు చేస్తున్నారు. ప్రపంచంలో ఎన్నడూ లేని విధంగా క్రూడ్‌ ఆయిల్‌ ‌ధరలు 70 ఏండ్ల గరిష్టానికి పడిపోయినా ధరలు తగ్గక పోవడానికి పన్నులే ప్రధానం. 1946లో బారెల్‌ ‌ధర ఎంత ఉందో ప్రస్తుతం అంతకు పడి పోయిందని విశ్లేషకులు చెబుతున్నారు. ప్రస్తుతం అంతర్జాతీయ మార్కెట్‌లో బారెల్‌ ‌ధర 23 నుండి 24 డాలర్ల మధ్య ట్రేడ్‌ అవుతోంది. ప్రపంచంలో ఇతర దేశాలలో బారెల్‌ ‌హెచ్చుతగ్గులను బట్టి పెట్రోల్‌, ‌డీజిల్‌ ‌ధరలు తగ్గుతున్నాయి, కాని మన దేశంలో మాత్రం పెరిగితే పెంచుతున్నారు కాని తగ్గితే దించకుండా టాక్సులతో బాదేస్తున్నారు.

ప్రపంచంలో అత్యధిక చమురు నిల్వలు ఉన్న 10 దేశాలలో వెనిజుల దేశానిది టాప్‌ ‌రాంక్‌. ఈ ‌దేశంలో ఉన్నంతగా చమురు ఏ దేశంలో లేదు. ఆ తర్వాత సౌదీ అరేబియా, కెనడా, ఇరాన్‌, ఇరాక్‌, ‌కువైట్‌, ‌యునైటెడ్‌ అరబ్‌ ఎమిరేట్స్, ‌రష్యా, లిబియా, అమెరికా దేశాలలో అత్యధికంగా చమురు నిల్వలున్నాయి. మన దేశానికి ప్రధానంగా ఇరాక్‌, ‌సౌది అరేబియా, ఇరాన్‌, ‌నైజీరియా, యునైటెడ్‌ అరబ్‌ ఎమిరేట్స్, ‌వెనిజులా మొదలైన దేశాల నుండి చమురు దిగుమతి అవుతుంది. దక్షిణ అమెరికా ప్రాంతంలోని వెనిజులా అత్యధిక ముడి చమురు నిల్వలున్న దేశాలలో ఒకటి. ఈ దేశంలో ప్రస్తుతం పెట్రోల్‌ ‌లీటర్‌ ‌ధర ఎంతో తెలిస్తే మనం ఆశ్చర్య పోతాం. ఈ దేశంలో ప్రస్తుతం లీటర్‌ ‌పెట్రోల్‌ ‌ధర మన ఇండియన్‌ ‌కరెన్సీలో చెప్పాలంటే కేవలం ఐదే ఐదు రూపాయలు. మనకు ఐదు రూపాయలకు ఓ చాక్లేట్‌ ‌కూడ రావడం లేదు. అట్లాగే ఇరాన్‌లో రూ.7.08, సుడాన్‌లో రూ.10.51 లకు లీటర్‌ ‌పెట్రోల్‌ ‌లభిస్తోంది. మన దేశంలో పెట్రోల్‌, ‌డీజిల్‌ ‌ధరలు తగ్గుతాయని జిఎస్టీ పరిధిలోకి వాటిని తీసుకు వస్తారని అంతా ఎదురు చూసినట్లు జరగ లేదు. అది సాధ్యం అయ్యే పని కాదని తేలి పోయింది. మేం సిద్దమే కాని రాష్ట్రాలు అడ్డుపడుతున్నాయని కేంద్రం నిందను రాష్ట్రాలపై మోపి చాలా సులభంగా ఎస్కేప్‌ అవుతోంది. పోనీ రాష్ట్రాలు ఏమైనా వదులుకుంటాయా అంటే వదులుకునే పరిస్థితిలో లేవు. ఎందుకంటే  ఆయా రాష్ట్రాలు అనేకం తమ ఎన్నికల వాగ్దానాలో భాగంగా ఇచ్చిన ఉచిత హామీలకు చాలా డబ్బులు అవసరం కాబట్టి ప్రధాన ఆదాయమ వనురును వదులుకునే స్థితిలో లేక జిఎస్టీలో చేర్చేందుకు ససేమిరా అంటున్నాయి. దరిమిలా పెట్రోల్‌, ‌డీజిల్‌ ‌ధరలు ప్రంపంచంలో అంతటా తగ్గినా మన దేశంలో మాత్రం తగ్గే అవకాశాలు కనిపించడం లేదు. ఆయిల్‌ ‌ధరల ప్రభావంతో సగటు సామాన్యుడిపై పడే ఆర్థిక భారం అంతా ఇంతా కాదు. ‘‘పెరిగితే  పెరగనీయండి – తగ్గక పోతే  పోనీయమని సరిపెట్టుకుంటే సరిపోదు. సగటు మనిషి ఆర్థిక జన జీవనంతో రవాణా వ్యవస్థది విడదీయలేని అనుబందం.

ఈ రంగం లేనిదే మన నోటి కాడికి ముద్ద కూడ అందదు. ఈ రంగంలో జరిగే వ్యయం అన్ని రంగాల వస్తు ఉత్పత్తి, సేవా రంగాల పద్దుల్లో ప్రధాన పద్దుగా నిలుస్తుంది. రవాణా ఖర్చు లెక్కలోకి తీసుకోకుండా ఏ వస్తువు ధర నిర్ణయం జరగదు. అందుకే ఆయిల్‌ ‌ధరలు తగ్గితే మిగతా రంగాలలో పాటు వస్తు ఉత్పాదక, సేవారంగాలలో కూడ ధరలు తగ్గుతాయి. చివరికి సామాన్యులపై భారం కూడ తగ్గుతుంది. ఓ సాధారణ  రైతు తన ఉత్పత్తులను మార్కెట్‌ ‌చేసుకోవాలంటే రవాణా భారం భరించ లేకనే మధ్యదలారులకు సరుకును అప్పగించాల్సి వస్తోంది. రైతు పండించిన పుచ్చకాయ చేనులో అయితే రూ 10 కే లభిస్తుంది. కాని అది హైదరాబాద్‌కు చేరే సరికి దాని ధర 100 రూపాయలు అవుతుంది. కాని ఇదంతా జరిగే పని కాదు. ధరలు ఇట్లా పెరుగుతూనే ఉంటాయి. మన కరెన్సీ అంతా పెరిగిన పెట్రోల్‌, ‌డీజిల్‌ ‌ధరల మంటల్లో  మాడి మసై పోవాల్సిందే. ప్రభుత్వాలకు ఆదాయం సమకూరాల్సిందే. ప్రభువులు ఉచితానుచితాలు ఆలోచించకుండా ఓట్ల కోసం ఇచ్చిన హామీలను నెరవేర్చుకునేందుకు, వారి కుర్చీని కాపాడుకునేందుకు ఈ భారన్నంతా సగటు మనిషి మోయాల్సిందే.

image.png

  కూన మహేందర్‌,
‌సీనియర్‌ ‌జర్నలిస్టు

Get real time updates directly on you device, subscribe now.

Leave a Reply

error: Content is protected !!