Take a fresh look at your lifestyle.

సంపూర్ణ అక్షరాస్యతే లక్ష్యం

“మన దేశంలో 36 రాష్ట్రాలు మరియు కేంద్ర పాలిత ప్రాంతాల్లో అక్షరాస్యతలో మిగిలిన రాష్ట్రాలతో పోలిస్తే తెలంగాణ రాష్టం క్రిందనుండి 4వ స్థానంలో కలదు. 2011 జనాభా లెక్కల ప్రకారం తెలంగాణ రాష్టంలో అక్షరాస్యత శాతం 66.54 మాత్రమే వున్నది. జార్ఖంఢ్‌, ‌రాజస్థాన్‌, అరుణాచల్‌ ‌ప్రదేశ్‌, ‌బీహార్‌ ‌రాష్టాలు మాత్రమే తెలంగాణ కన్నా వెనుకబడి వున్నవి. అన్ని రంగాలలో అగ్రభాగాన ఉన్న తెలంగాణా రాష్ట్రం అక్షరాస్యతలో వెనుకబడి ఉండడంతో జాతీయస్థాయిలో మానవ అభివృద్ధి సూచీలో వెనుకబడి ఉన్నాము. అక్షరాస్యతా శాతం పెరిగితే మానవ అభివృద్ధి సూచీలో మన స్ధానం మెరుగు పడుతుంది.”

అంతర్జాతీయ అక్షరాస్యతా దినోత్స వాన్ని ప్రతి సంవ త్సరం సెప్టెంబర్‌ 8 ‌వ తేదీన 1967వ సంవత్సరం నుండి ప్రపంచ వ్యాప్తంగా అన్ని దేశాలలో జరుపుకుంటున్నాము. వ్యక్తులు, సంఘాలు మరియు సమాజానికి అక్షరాస్యత యొక్క ప్రాముఖ్యతను తెలియజేస్తూ, అక్షరాస్యతా శాతాన్ని పెంచుటకు కృషి చేయడమే అంతర్జాతీయ అక్షరాస్యతా దినోత్సవం యొక్క ముఖ్య లక్ష్యం. ముఖ్యంగా పేదరికంలో మగ్గుతున్న దేశాలలో నిరక్షరాస్యుల సంఖ్య ఎక్కువగా ఉంటున్నది. ప్రపంచ దేశాల్లోని నిరక్షరాస్యులలో అత్యధిక మంది నిరక్షరాస్యులు మన దేశంలోనే ఉండడం విచారకరం. ప్రపంచంలో అభివృద్ధి చెందుతున్న ఇతర దేశాలతో పోలిస్తే అక్షరాస్యతలో భారతదేశం చాలా వెనుకబడి ఉన్నట్లు గణాంకాలు చెప్తున్నాయి. దీని వలన మనదేశం మానవ అభివృద్ధి సూచికలో 130వ స్థానంలో ఉన్నది. స్థిరమైన అభివృద్ధి సాధించాలంటే దేశంలో 80 శాతానికి పైగా అక్షరాస్యత సాధించాల్సిన ఆవశ్యకత కలదు. స్వాతంత్య్రం వచ్చి 74 ఏళ్లు గడిచినా అక్షరాస్యతలో వెనుకబడే వున్నాము. మనదేశంలో అధిక జనాభా, మూఢ నమ్మకాలు, పేదరికం, ఆడపిల్లలకు, మహిళలకు చదువు ఎందుకనే భావం, అణగారిన వర్గాల పట్ల శ్రద్ధ లేకపోవడం, ప్రాంతీయ అసమానతలు లాంటి ఎన్నో కారణాలు నిరక్షరాస్యతకు కారణమవుతున్నవి. నిరక్షరాస్యత నిర్మూలనకు కేంద్ర, రాష్ట్ర ప్రభుత్వాలు ఎన్నో పథకాలు ప్రవేశ పెట్టినా, కోట్లాది రూపాయలు ఖర్చు చేసినా ఆశించిన ఫలితాలు రావడం లేదు. ముఖ్యంగా మనదేశంలో అక్షరాస్యతా రేటు విషయంలో విస్తృత స్థాయిలో లింగపరమైన అసమానత కలదు. 2011 జనాభా లెక్కల ప్రకారం భారత దేశ అక్షరాస్యత రేటు 74.04శాతం కాగా అందులో పురుషుల అక్షరాస్యత శాతం 82.14శాతం కాగా మహిళల అక్షరాస్యతా రేటు 65.46 మాత్రమే కలదు. భారత దేశ ఈశాన్య రాష్ట్రమైన త్రిపుర అక్షరాస్యతలో 94.65 శాతంతో కేరళను (93.91శాతం) దాటింది. త్రిపురలో అక్షరాస్యతను పెంచడానికి గ్రామ పంచాయతీలు, అంగన్‌ ‌వాడీ కార్మికులు, స్వచ్చంధ సంస్థలు మరియు స్థానికంగా గల యువజన సంఘాలు గణనీయమైన పాత్ర పోషించినవి. వారందరి కృషితో త్రిపురలో అక్షరాస్యతా శాతం గణనీయంగా పెరిగింది. ముఖ్యంగా వారు మహిళా అక్షరాస్యతపై ప్రత్యేక దృష్టి పెట్టడం జరిగింది.

మన దేశంలో 36 రాష్ట్రాలు మరియు కేంద్ర పాలిత ప్రాంతాల్లో అక్షరాస్యతలో మిగిలిన రాష్ట్రాలతో పోలిస్తే తెలంగాణ రాష్టం క్రిందనుండి 4వ స్థానంలో కలదు. 2011 జనాభా లెక్కల ప్రకారం తెలంగాణ రాష్టంలో అక్షరాస్యత శాతం 66.54 మాత్రమే వున్నది. జార్ఖంఢ్‌, ‌రాజస్థాన్‌, అరుణాచల్‌ ‌ప్రదేశ్‌, ‌బీహార్‌ ‌రాష్టాలు మాత్రమే తెలంగాణ కన్నా వెనుకబడి వున్నవి. అన్ని రంగాలలో అగ్రభాగాన ఉన్న తెలంగాణా రాష్ట్రం అక్షరాస్యతలో వెనుకబడి ఉండడంతో జాతీయస్థాయిలో మానవ అభివృద్ధి సూచీలో వెనుకబడి ఉన్నాము. అక్షరాస్యతా శాతం పెరిగితే మానవ అభివృద్ధి సూచీలో మన స్ధానం మెరుగు పడుతుంది. ముఖ్య మంత్రి కేసీఆర్‌ ‌గారు అక్షరాస్యత పెంపుపై ప్రత్యేక దృష్టి పెడుతున్నారు. వారి ఆలోచన, జాతీయ అక్షరాస్యత సగటు కంటే అక్షరాస్యతను పెంచడము మాత్రమే కాదు. అసలు లక్ష్యం తెలంగాణా రాష్ట్రంలో సంపూర్ణ అక్షరాస్యత సాధించడమే. వ్యాపార అనుకూలతలో రాష్ట్రానికి తొలి స్థానం. మిషన్‌ ‌భగీరథ, కాళేశ్వరం లాంటి భారీ పధకాలు రాష్ట్ర కీర్తిని అంతర్జాతీయ స్థాయిలో నిలిపాయి. సాటిలేని సంక్షేమం, తిరుగులేని అభివృద్ధి, సుస్థిర పరిపాలన, నాణ్యమైన జీవన ప్రమాణాలతో తెలంగాణా రాష్ట్రం దేశంలోనే అగ్రగామిగా ముందుకు దూసుకుపోతున్నది. ఇవన్నీ ఘనంగా ఉన్న తెలంగాణా రాష్ట్రానికి ‘నిరక్షరాస్యత’ అనునది జాతీయ స్థాయిలో రాష్ట్ర ప్రతిష్టను మసక బారుస్తున్నది. అప్పట్లో కేంద్ర ప్రభుత్వం అమలు చేసిన సాక్షర భారత్‌ ‌కార్యక్రమంతో కొంత ప్రయోజనం చేకూరింది. కానీ ఆ కార్యక్రమం మార్చి 2018తో ముగిసిపోయింది. కేంద్ర ప్రభుత్వం ఆ పథకాన్ని తిరిగి పొడిగించలేదు. దీనిని దృష్టియందుంచుకొని ముఖ్యమంత్రి కేసీఆర్‌ ‌గారు తెలంగాణా రాష్ట్రాన్ని సంపూర్ణ అక్షరాస్యతా రాష్ట్రంగా మార్చేందుకు అత్యంత ప్రాముఖ్యత నిస్తున్నారు. అక్షరాస్యత కార్యక్రమాల ద్వారా తెలంగాణాలోని నిరక్షరాస్యులందరిని, అక్షరాస్యులుగా మార్చేందుకు రాష్ట్ర ప్రభుత్వం ప్రణాళికలను సిద్ధం చేయుచున్నది. దీనికి కేంద్ర ప్రభుత్వం తగిన సహాయ సహకారాలు అందించి తన వంతు పాత్ర పోషించాల్సిన అవసరం కలదు.

2021 జనాభా లెక్కలకు ముందే తెలంగాణా రాష్ట్రములో అక్షరాస్యతా శాతం పెంచేందుకు రాష్ట్ర ప్రభుత్వం కృత నిశ్చయంతో ఉన్నది. 2021లో జరిగే జనాభా లెక్కల్లో అక్షరాస్యతా శాతం వెల్లడవుతుంది. అప్పుడు సైతం వెనుకబడితే మరో దశాబ్దం పాటు జాతీయ స్థాయిలో తెలంగాణా పై చులకన భావం ఏర్పడుతుంది. దీన్ని ఎదుర్కోవాలంటే జనాభా లెక్కల కంటే ముందే ఒక ప్రజా ఉద్యమంలా సంపూర్ణ అక్షరాస్యతా కార్యక్రమాన్ని చేపట్టాల్సిన అవసరం కలదు. సంపూర్ణ అక్షరాస్యత కార్యక్రమం అమలు కొరకు తెలంగాణా రాష్ట్రంలో గల నిరక్షరాస్యుల వివరాలను రాష్ట్ర ప్రభుత్వం పల్లెప్రగతి మరియు పట్టణ ప్రగతి ద్వారా సేకరించింది. దీనిలో 18 సంవత్సరాలు పూర్తి చేసుకున్న నిరక్షరాస్యుల వివరాలను 12,751 గ్రామాల్లో మరియు 138 మున్సిపాలిటీలు మరియు కార్పొరేషన్‌లలో సేకరించింది. ఈ సర్వే వివరాలన్నింటినీ ఆన్‌ ‌లైన్‌లో నమోదు చేయించడం జరిగింది. ఈ సందర్భంగా నిరక్షరాస్యుల జాబితాలో మహిళలే ఎక్కువ మంది ఉన్నట్లు తెలుస్తున్నది. ముఖ్యంగా గ్రామీణ ప్రాంతాల్లో 50 ఏండ్లకు పైబడిన వారిలో నిరక్షరాస్యులు ఎక్కువగా ఉన్నట్లు వెల్లడయింది. వీటన్నింటిని దృష్టి యందుంచుకొని ప్రభుత్వం ప్రణాళికలు సిద్ధం చేసే అవకాశం కలదు. తెలంగాణా రాష్ట్రం ఏర్పడిన తరువాత విద్యా రంగంలో మన రాష్ట్రం మిగిలిన అన్ని రాష్ట్రాలకు ఒక నమూనాగా మారిందని చెప్పవచ్చు.ై‘కేజీ టు పీజీ’ వరకు ఉచిత విద్యను అందించే దిశగా ప్రభుత్వం అనేక విద్యా సంస్కరణలు చేపట్టింది. రాష్ట్రంలో బీసీ, మైనార్టీ, ఎస్సీ, ఎస్టీలలో గల బాలికల కొరకు గురుకుల పాఠశాలలు, మోడల్‌ ‌స్కూల్స్ ‌నెలకొల్పడం జరిగింది. 100 శాతం హాజరు ఉన్న విద్యార్థినీ, విద్యార్థులకు సైకిళ్ళు పంపిణీ చేయడం కూడా జరుగుతున్నది. విలువలతో కూడిన నాణ్యమైన విద్య కోసం విద్యా రంగంలో ప్రభుత్వం అనేక సంస్కరణలు తీసుకురావడం జరుగుచున్నది. కొరోనా కారణంగా ప్రభుత్వం చేపట్టబోయే అక్షరాస్యత కార్యక్రమాలు కొంత మేర మందగించాయి అని చెప్పవచు. పరిస్థితులు కొంత మెరుగు పడగానే సంపూర్ణ అక్షరాస్యత కార్యక్రమాలు వేగం పుంజుకునే అవకాశం కలదు.

అసాధ్యం అనుకున్న తెలంగాణా రాష్ట్రాన్ని సాధించుకున్న మనకు సంపూర్ణ అక్షరాస్యతను సాధించడం అసాధ్యమేమీ కాదు. ముఖ్యంగా ప్రజా ప్రతినిధులు, అధికారులు, పోలీసులు, యువజన సంఘాలు, స్వచ్చంధ సంస్థలు, రాజకీయ పార్టీలు, కులసంఘాలు, కార్పొరేట్‌ ‌సంస్థలు, పాఠశాలలు, జూనియర్‌ ‌కళాశాలలు, డిగ్రీ కళాశాలలు, వృత్తి విద్యా కళాశాలలు, యూనివర్సిటీ విద్యార్థులు ప్రతి ఒక్కరు అక్షరాస్యత కార్యక్రమంలో భాగస్వామ్యులయితే సంపూర్ణ అక్షరాస్యతా కార్యక్రమం విజయవంతం కాగలదు. ముఖ్యంగా మహిళా సంఘాలను పూర్తి స్థాయిలో భాగస్వామ్యులను చేయాలి. ప్రతి విద్యావంతుడు ఒక నిరక్షరాస్యుడిని దత్తత తీసుకొని చదువు నేర్పించే బాధ్యత తీసుకోవాలి. వయోజనులను అక్షరాస్యులుగా తీర్చిదిద్దడానికి యుద్ధ ప్రాతిపదికన మనందరం పని చేయాల్సిన అవసరం కలదు. ముఖ్యమంత్రి గారు ప్రత్యేక దృష్టి పెడుతున్నందున విద్యావంతులైన తెలంగాణ రాష్టంలోని ప్రతి ఒక్కరు స్వచ్ఛందంగా ముందుకు వచ్చి సామాజిక భాద్యతగా అక్షరాస్యతా పెంపునకు మనస్ఫూర్తిగా కృషి చేస్తే రాష్ట్రం సంపూర్ణ అక్షరాస్యతా రాష్ట్రంగా మారుతుందనుటలో ఎటువంటి అతిశయోక్తి లేదు’’. 100 శాతం అక్షరాస్యతే లక్ష్యంగా మనందరం కృషి చేయాల్సిన ఆవశ్యకత కలదు. ‘విద్యా దానం-మహా దానం’ స్పూర్తితో అక్షరాస్యతా పెంపుకు కృషిచేద్దాం.

Leave a Reply