కౌంటింగ్‌ కేంద్రాల్లో .. నేతల మోహరింపు
- గెలిచిన అభ్యర్థులను క్యాంపుకు తరలించే యోచనలో టీఆర్‌ఎస్‌
- అధికార పార్టీ వలలో చిక్కకుండా కాపాడుకునే జాగ్రత్తలో కాంగ్రెస్‌, బీజేపీ
రాష్ట్రంలో మున్సిపల్‌ ఎన్నికల ప్రక్రియ తుది అంకానికి చేరింది. నువ్వా నేనా అన్న రీతిలో సాగిన ఎన్నికలలో విజేతలెవరో నేడు తేలనుంది. తమ రాజకీయ భవిష్యత్తును నిర్ణయించే సమయం దగ్గర పడటంతో అభ్యర్థులు అప్రమత్తమయ్యారు. శనివారం ఫలితాల లెక్కింపు జరుగనున్న నేపథ్యంలో అన్ని పార్టీలు ఆయా లెక్కింపు కేంద్రాలలో తమ నేతలను మోహరిస్తున్నాయి. ఎన్నికల ఫలితాల లెక్కింపు ప్రక్రియ ఉదయం 8 గంటల నుంచి ప్రారంభం కానుండటంతో బ్యాలెట్‌ బాక్సులను భద్రపరచిన స్ట్రాంగ్‌ రూంల నుంచి మొదలుకుని మొత్తం ఫలితాలు వెల్లడయ్యే వరకూ ఎక్కడా ఏ చిన్న పొరపాటు జరగకుండా అన్ని ముందు జాగ్రత్త చర్యలు తీసుకుంటున్నారు. కార్పొరేషన్‌ మేయర్లు, మున్సిపల్‌ చైర్మన్ల ఎన్నికల ఈనెల 27నజరుగనుంది.
అంటే ఎన్నికల ఫలితాలు వెల్లడైన తరువాత రెండు రోజుల వ్యవధి ఉంటుంది. దీంతో ఆయా పార్టీల పక్షాన ఎన్నికలలో గెలిచిన వార్డు సభ్యులు, కౌన్సిలర్లు ఇతర పార్టీల వైపు దూకే అవకాశం ఉంది. దీనిని దృష్టిలో ఉంచుకుని అన్ని రాజకీయ పార్టీలు గెలిచిన తమ కౌన్సిలర్లు, వార్డు సభ్యులను కాపాడుకునే యత్నాలను ప్రారంభించాయి. ఎట్టి పరిస్థితుల్లోనూ రాష్ట్రంలోని అత్యధిక మున్సిపాలిటీలు, కార్పొరేషన్లను కైవలం చేసుకోవాలన్న పట్టుదలతో అధికార టీఆర్‌ఎస్‌ ఉం‌డగా, తమ పార్టీ పక్షాన గెలిచిన కౌన్సిలర్లు, వార్డు సభ్యులు తమ చేతుల్లో నుంచి జారి పోకుండా చూడాలని కాంగ్రెస్‌, బీజేపీ నేతలు భావిస్తున్నారు. ఇందులో భాగంగా మున్సిపల్‌ ఎన్నికల్లో పోటీ చేసిన తమ అభ్యర్థులను శిబిరాలలో ఉంచాలని టీఆర్‌ఆర్‌ భావిస్తోంది. అభ్యర్థులను రెండు రోజుల పాటు క్యాంపుల్లో ఉంచాలని టీఆర్‌ఎస్‌ అధిష్టానం ఇప్పటికే ఆదేశాలు జారీ చేసింది. ఈమేరకు మున్సిపల్‌ చైర్మన్‌, కార్పొరేషన్ల మేయర్ల ఎన్నిక జరిగే క్రమంలో విప్‌ జారీ చేసే అధికారాన్ని ఆ పార్టీ ఎమ్మెల్యేలకు సీఎం కేసీఆర్‌ ఇచ్చారు. ఇక గత అసెంబ్లీ, స్థానిక సంస్థల ఎన్నికలలో కాంగ్రెస్‌ పార్టీ పక్షాన ఎన్నికైన ప్రజాప్రతినిధులు అధికార పార్టీ గూటికి చేరారు. బీజేపీపై ఈ ప్రభావం అంత పెద్దగా లేనప్పటికీ మున్సిపల్‌ ఎన్నికలలో గెలిచిన అభ్యర్థులను అధికార పార్టీ ప్రలోభాలకు గురి చేసే అవకాశం ఉంది. దీంతో ఈ రెండు పార్టీల నేతలు కూడా తమ అభ్యర్థులు అధికార పార్టీ వలలో చిక్కకుండా చూసుకోవాలనే ఆలోచనలో ఉన్నారు. అయితే, అధికార టీఆర్‌ఎస్‌ పార్టీ మాదిరిగా కాకుండా తమ పార్టీ అభ్యర్థులు ఎంత మంది గెలుస్తారో చూసిన తరువాత దానికి అనుగుణంగా ముందు జాగ్రత్తలు చేపట్టాలనే ఆలోచనలు ఉన్నారు. ఇందులో భాగంగా ఫలితాలు వెల్లడి కాగానే గెలిచిన తమ పార్టీ అభ్యర్థులను రహాస్య ప్రదేశానికి తరలించాలని భావిస్తున్నట్లు సమాచారం.