Take a fresh look at your lifestyle.

రంగుల రంగోలి హోలీ….

కులమత బేధాలు లేకుండా అందరూ కలిసి ఆనందోత్సవాల మధ్య జరుపుకునే పండుగ హోలీ పండుగ. హోలీ వస్తుందంటే చాలు దేశమంతటా పండుగే దీపావళి పండుగ తర్వాత అత్యంత అంగరంగ వైభవంగా జరుపుకునే పండుగల్లో హోలీ పండుగ ఒకటి.

రంగుల పండుగ హోలీ అంటే అందరికి ఎంతో ఉత్సాహం. చిన్న, పెద్ద అనే తారతమ్యం లేకుండా వివిధ రంగులను స్నేహితులపై, బంధువులపై చల్లుకుంటూ ఎంతో ఉత్సాహంగా జరుపుకునే ఈ పండుగ ఫాల్గుణ శుద్ధ పూర్ణిమ నాడు వస్తుంది. ఫాల్గుణ శుద్ధ పూర్ణిమను మహా పాల్గుణి అని, హోలికా, హోలికాదాహో (హోళీ) అనే పేర్లతో పిలుస్తుంటారు. అలాగే హుతాశనీ పూర్ణిమా, వహ్ని ఉత్సవం అని కూడా అంటారు.

హోళీ రోజున దేశంలోని పలు ప్రాంతాల్లో లక్ష్మీ నారాయణ వ్రతం, అశోక పూర్ణిమా వ్రతం, చంద్రపూజ వంటివి జరుపుతుంటారు. మన రాష్ట్రంలో కాముని పున్నమిగా ప్రసిద్ధి చెందిన ఈ హోలీ పండుగ రోజు (ఫాల్గుణ శుద్ధ పూర్ణిమ) చంద్రుడు ఉత్తర ఫల్గుణీ నక్షత్రంలో ఉంటాడని ప్రతీతి. అందుచేత ఈ రోజున చంద్ర పూజ, సత్యనారాయణ స్వామి పూజ చేసే వారికి అష్టైశ్వర్యాలు చేకూరుతాయని పురోహితులు అంటున్నారు.హోలీ పండుగనాడు రంగులను వరసైన వారి మీద చల్లుతూ ఉత్సాహంతో, సంతోషంతో గడుపుతూంటారు. ఈ వేడుక రాబోయే ఆనందకర వసంత రుతువుకు స్వాగత సన్నాహమేనని, ఈ సన్నాహమే సంప్రదాయంగా పరిణమించిందని పురోహితులు చెబుతున్నారు.

ఇంకా హోలీ పండుగ రోజు రాత్రి కొన్ని ప్రాంతాల్లో నాలుగు వీధులు కలిసే చోట పెద్ద పెద్ద భాండాలలో రంగు నీళ్లను నింపి ఉంచుతారు. ఆ నీళ్ళను ఒకరిమీద ఒకరు చల్లుకుంటూ సంతోషంగా కాలం గడుపుతారు. మొత్తానికి హోలీ పండుగ వ్రతం చేసుకునే పెద్ద వాళ్ళకు భక్తిని పంచుతూ, చిన్నారులకు, యువతకు ఆనందాన్ని చేకూర్చుతూ వినోదాల సంబరాలను పంచిపెడుతోంది. కాబట్టి ఈ హోలీ పండుగ అందరి జీవితాల్లో వెలుగులు నింపాలని ఆశిద్దాం..!
– నరేష్‌ ‌జాటోత్‌. ‌లెక్చరర్‌ ఇన్‌ ‌పొలిటికల్‌ ‌సైన్స్ .‌ సిద్ధార్థ డిగ్రీ అండ్‌ ‌పీజీ కాలేజ్‌ ‌నల్లగొండ.(8247887267)

Leave a Reply