Take a fresh look at your lifestyle.

చినుకమ్మ

చినుకమ్మ
ఎందుకమ్మ నీ చెణుకులతో
కంటి మీద కునుకు లేకుండా చేస్తున్నవ్‌

‌తొలకరికి పలకరించి
మము పులకరింప జేసిన
ఆనందం అంతలోనే ఆవిరి చేయడం
నీ కెట్లా న్యాయమమ్మా

బంగాళా ఖాతంలో వాయుగుండం
మా పాలిట గండమై
నిదానంగా కురిసె నీలో
ఆవేశాన్ని నింపితే నిగ్రహించుకోకుండా
పచ్చగా పరవశిస్తున్న మా పంటచేలపై
పగబట్టి పంజా విసరడం
నీకు తగునానమ్మా

ఎత్తు మేడల్లోని మనుషులపై
మెత్తని ప్రేమను కురిపించి
పల్లపు నేల బతుకులపై
నీ ప్రతాపం చూపడం
పాలకులిచ్చిన శిక్షణనుకుంటా?

నీవు సకాలంలో కురిస్తేనే హర్షం
కాదు కూడదంటూ
కాని కాలంలో వచ్చి ఇష్టం లేకున్నా తిష్ట వేసి
మమ్ముల కష్టపెట్టడం  చూస్తుంటే నాకనిపిస్తుంది
ఆధిపత్యము కొరకు హద్దులు మీరే
మనుషుల లెక్కనే
నీవు కూడా అవ లక్షణాలను
ఒంట బట్టించుకొని అదుపు తప్పుతున్నట్లు.

వద్దమ్మా వద్దు నిన్నిట్లా చూడలేము
నీ సహజత్వాన్ని దెబ్బతీసి
ఫలితాన్ని  ఆనుభవిస్తున్న
అపరాధం మాదేకావచ్చు

అయినా నీవు శాంతిస్తేనే
మళ్ళీ నిన్ను ప్రేమగా స్వాగతిస్తాం….కాస్త నిదానించు…
– గన్‌ ‌రెడ్డి ఆదిరెడ్డి, 9494789731

Get real time updates directly on you device, subscribe now.

Leave a Reply