Take a fresh look at your lifestyle.

ఎపిని అప్పుల కుప్పగా మార్చారు

  • సర్కార్‌ ‌తీరుపై మండిపడ్డ మాజీమంత్రి యనమల
  • కేంద్రం ఆదేశాలపై వివరాలు వెల్లడించాలని డిమాండ్‌

అమరావతి,జూలై 29 : ఆంధ్రప్రదేశ్‌ ‌రెండేళ్లలో అప్పుల కుప్పగా మారిందని టిడిపి నేత మాజీ ఆర్థికశాఖ మంత్రి యనమల రామకృష్ణుడు అన్నారు. ఆదాయానికి మించి అప్పులు చేయడంతో ఖాజానా గుల్లయ్యిందన్నారు. ఉద్యోగుల జీతాలు, పెన్షన్ల కోసం కూడా వెతుక్కునే పరిస్థితి ఏర్పడిందన్నారు. పరిమితికి మించి అప్పులు చేయడం, ఆస్తుల తాకట్టుపెట్టి బ్యాంకుల నుంచి రుణాలు తీసుకోవడంపై కేంద్ర ప్రభుత్వం నిఘా పెట్టిందన్న సమాచారం ఆందోళన కలిగిస్తోందని చెప్పారు. ఇదిలావుంటే పరిమితికి మించి తీసుకున్న అప్పులను తిరిగి చెల్లించాలని నోటీసులు పంపించింది. 2019 నుంచి నేటి వరకు సుమారు రూ. 2 లక్షల కోట్ల వరకు అప్పులు తీసుకువచ్చారు.

ఇవి కాకుండా రాష్ట్ర ఆస్తులను తాకట్టు పెట్టి రాష్ట్రాభివృద్ధి కార్పొరేషన్‌ ‌ద్వారా రూ. 25వేల కోట్ల రుణం తీసుకునేందుకు బ్యాంకుల కన్సార్టియంతో మాట్లాడి.. రూ. 21.500 కోట్లు రుణంగా తెచ్చారు. ఎఫ్‌ఆర్‌బీఎం పరిమితిని సవరించినప్పటికీ కూడా ఏపీకి అప్పులు సరిపోవడం లేదు. సాధారణంగా జీఎస్డీపీలో 3 శాతం రుణం తీసుకునేందుకు అవకాశం ఉంటుంది. ఏపీలో జీఎస్డీపీ ప్రకారం రూ. 30,305 కోట్ల రుణం తీసుకునేందుకు కేంద్రం అవకాశం కల్పించింది. కోవిడ్‌ ‌కారణంగా ఆర్థిక పరిస్థితి దెబ్బతినడం, ఆదాయం తగ్గిపోవడంతో అన్ని రాష్ట్రాలకు 2 శాతం అదనంగా అప్పు తెచ్చుకునేందుకు కేంద్ర ప్రభుత్వం అవకాశం కల్పించింది.

ఏపీ ప్రభుత్వం కేంద్రం విధించిన షరతులను అమలు చేసి పెంచిన శాతం మేరకు అప్పులు తీసుకువచ్చింది. కేంద్రం వెల్లడించిన లెక్కల ప్రకారం పెంచిన శాతంతో కలిపి రూ. 49,497 కోట్ల రుణం తీసుకోవల్సి ఉండగా రూ. 54 వేల కోట్ల రుణం తీసుకువచ్చిందని కేంద్రం ప్రకటించింది. ఆర్థిక లోటు కూడా రోజు రోజుకూ పెరిగిపోతుందని, పరిమితికి మించి తీసుకున్న అప్పులను తిరిగి చెల్లించాలని కేంద్రం ఏపీకి నోటీసులు పంపించింది. ఈ విషయాలపై చర్చ జరగాల్సి ఉందిన యనమల అన్నారు. అలాగే అప్పులతోనే రాష్ట్రం నడపడం వల్ల దివాళాకు చేరిందని పిఎసి ఛైర్మన్‌ ‌పయ్యావుల కేశవ్‌ అభిప్రాయపడ్డారు.

Leave a Reply