ఆస్ట్రేలియా పార్లమెంట్‌ ‌ముందు బతుకమ్మ సందడి

ఆడిపాడిన తెలంగాణ వాసులు.. జతకట్టిన స్థానిక మహిళలు
హైదరాబాద్‌, ‌సెప్టెంబర్‌ 27 : ‌తెలంగాణ రాష్ట్ర సంస్కృతి ని ఖండాతరాల్లో వ్యాపింపజేసిన గొప్ప పండుగ బతుకమ్మ. మన తెలుగు వారు ప్రపంచంలో ఏ మూలన ఉన్నా సరే మన సాంప్రదాయలను వెలుగెత్తి చాటుతున్నారు. తాజాగా ఆస్టేల్రియాలో ఉన్న తెలుగు వారు ఆ దేశ పార్లమెంట్‌ ఎదుట బతుకమ్మ ఉత్సవాలు నిర్వహించారు. కార్యక్రమానికి అక్కడి తెలుగు వారితో పాటు ఆస్టేల్రియా మహిళలూ తీరొక్క పూలతో బతుకమ్మను పేర్చి ఉత్సాహంగా ఆడి పాడారు. తెలంగాణ అసోసియేషన్‌ ఆధ్వర్యంలో ఆస్టేల్రియన్‌ ‌పార్లమెంట్‌ ఎదుట ఘనంగా బతుకమ్మ వేడుకలను నిర్వహించారు. అక్కడి తెలుగు వారు చీరలు, పంచెలు కట్టుకొని కార్యక్రమానికి హాజరు కాగా.. వాతావరణమంతా సందడిగా మారింది. అధిక సంఖ్యలో మహిళలు, పిల్లలు పూలను బతుకమ్మలుగా పేర్చి ఆడిపాడటంతో కాన్‌బెర్రాలోని పార్లమెంట్‌ ‌పరిసర ప్రాంతం ఒక్కసారిగా తెలంగాణ వాతావరణాన్ని ప్రతిబింబించింది.

ఈ కార్యక్రమంలో పాల్గొన్న తెలుగు సింగర్‌ ‌మను పలు పాటలు పాడి అందరినీ ఉత్సాహపరిచారు. దక్షిణ భారతదేశం తరఫు ఒక పండుగను మొదటిసారిగా ఆస్టేల్రియా పార్లమెంట్‌ ‌ముందు నిర్వహించిన ఘనత తెలుగు వారికి దక్కడం గర్వకారణంగా ఉందని అసోసియేషన్‌ ‌ప్రతినిధులు హర్షం వ్యక్తం చేశారు. తెలంగాణ సంస్కృతి.. విశిష్ఠతను తెలియజేయడమే ధ్యేయంగా ఈ వేడుకలను నిర్వహించామని.. దానికి భారీగా స్పందన రావడం చాలా సంతోషంగా ఉందని వారు ఆనందం వ్యక్తం చేశారు. కార్యక్రమంలో తెలుగు వారితో పాటు ఆస్టేల్రియా మహిళలు, అక్కడి ప్రజాపతినిధులు అధిక సంఖ్యలో పాల్గొన్నారు.

Comments (0)
Add Comment