Take a fresh look at your lifestyle.

తహసిల్దార్‌ ‌కార్యాలయాల్లో సోదాలు

ఎసిబి దాడులతో అధికారుల్లో కలవరం
రెవెన్యూ అవినీతిపై ఫిర్యాదులతో దాడులు

విశాఖపట్టణం, జూలై 22 : విశాఖపట్నం, విజయనగరం జిల్లాల పరిధిలోని 12 తహసీల్దార్‌ ‌కార్యాలయాల్లో అవినీతి నిరోధక శాఖ సోదాలు నిర్వహించడం కలకలం రేపుతోంది. విశాఖపట్నం లోని సీతమ్మధార, పెందుర్తి, ఆనందపురం, పద్మనాభం, విశాఖ గ్రాణం, అచ్యుతాపురం తహసీల్దార్‌ ‌కార్యాలయాల్లో అనిశా అధికారులు సోదాలు నిర్వహించారు. అలాగే విజయనగరం జిల్లాలోని ఆరు తహసీల్దార్‌ ‌కార్యాలయాల్లోనూ సోదాలు చేపట్టారు. రెండు జిల్లాల్లోనూ ఆరు బృందాలు చొప్పున ఏర్పడిన అనిశా అధికారులు సోదాలు చేశారు. ఒక్కో బృందంలో ఇద్దరు ఇన్‌స్పెక్టర్లు, ఇతర సహాయ సిబ్బంది ఉన్నారు. మూడు బృందాలకు ఒక డీఎస్పీ పర్యవేక్షకుడుగా ఉన్నారు. విశాఖ జిల్లాలో సోదాలను అనిశా అదనపు ఎస్పీ పర్యవేక్షించారు.  పారిశ్రామికంగా అభివృద్ధి చెందుతున్న అచ్యుతాపురంలో రియల్‌ ఎస్టేట్‌ ‌వ్యాపారం భారీ స్థాయిలో పెరిగింది. దీంతో భూముల ధరలు కూడా ఆకాశాన్నంటుతున్నాయి. భూ లావాదేవీలు భారీ స్థాయిలో పెరిగాయి. దీనికి తోడు మండల పరిధిలో ప్రభుత్వ భూములు కూడా అధికంగా ఉన్నాయి.

పలువురు స్థానిక నాయకులు జిరాయితీ భూములతో పాటు పక్కనే గల ప్రభుత్వ భూముల్ని కూడా రియల్టర్‌లకు అప్పగించేస్తున్నారని, ఇందుకు రెవెన్యూ అధికారుల అండదండలు ఉన్నాయని ఏసీబీకి ఫిర్యాదు లందాయి. దీనికి తోడు తహసీల్దార్‌ ‌కార్యాలయంలో చేతులు తడిపితే గానీ ఏ పనులు కావని జోరుగా ప్రచారంలో ఉంది. ఫిర్యాదులపై స్పందించిన ఏసీబీ అధికారులు రెండు రోజులుగా సోదాలు నిర్వహిస్తున్నారని తెలిసింది. రికార్డులతో పాటు కంప్యూటర్లలో నిక్షిప్తమై ఉన్న వివరాలపై కూడా ఏసీబీ డీఎస్పీ డీవీఎస్‌ఎస్‌ ‌రమణ ఆధ్వర్యంలో ఆరా తీస్తున్నట్టు సమాచారం. విశాఖలోని ఆరు తహసీల్దార్‌ ‌కార్యాలయాల్లో ఈ రోజంతా అనిశా అధికారుల సోదాలు కొనసాగాయి.

సెలవు రోజున కూడా అధికారులు దస్త్రాలు పరిశీలించారు. 14,400 కాల్‌ ‌సెంటర్‌ ‌ఫిర్యాదులు, ఫోన్ల ద్వారా వచ్చిన ఫిర్యాదులపై ప్రత్యేక దృష్టి పెట్టినట్లు అధికారులు తెలిపారు. సరైన కారణం లేకుండా దరఖాస్తులు, పరిశీలన చేయకుండా, పరిష్కరించకుండా తిరస్కరిస్తున్నారన్న ఫిర్యాదులపైనా సమగ్ర పరిశీలన చేస్తున్నట్లు వెల్లడించారు. విశాఖ అర్బన్‌ ‌సీతమ్మధార ఎంఆర్‌వో కార్యాలయంలో దస్త్రాల నిర్వహణ సరిగ్గా లేకపోవడంతో పరిశీలనకు ఎక్కవ సమయం పడుతోందన్నారు.

అక్కడ తనిఖీలు చేస్తున్న అనిశా బృందానికి పెద్ద సంఖ్యలో బాధితులు, ఫిర్యాదుదారులు వచ్చి తమ గోడు వినిపిస్తున్నారు. విజయనగరం జిల్లాలోని ఆరు తహసీల్దార్‌ ‌కార్యాలయాల్లో మొదటి రోజు తనిఖీలు చేపట్టిన కార్యాలయాల్లో రెండో రోజూ తనిఖీలు కొనసాగించారు. విశాఖ సప మండలాలైన భోగాపురం, డెంకాడ, పూసపాటిరేగ, ఎస్‌.‌కోట, కొత్తవలస, జామి తహసీల్దార్‌ ‌కార్యాలయాల్లో బుధవారం ఏకకాలంలో సోదాలు నిర్వహించారు. ఇద్దరు డీఎస్పీ, 10మంది సీఐల ఆధ్వర్యంలో ఆయా కార్యాలయాలకు చేరుకొని దస్త్రాలను పరిశీలించారు.
ప్రధానంగా భూ లావాదేవీలు, పట్టాదారు పాసు పుస్తకాలు, ఇంటి స్థలాలు, కుల ధ్రువీకరణ పత్రాల జారీ, సిటిజన్‌ ‌ఛార్ట్ అమలు తదితర అంశాలకు సంబంధించిన దస్త్రాలను పరిశీలించినట్లు తెలుస్తోంది.  సేవల ద్వారా ప్రజల నుంచి వచ్చిన దరఖాస్తుల పెండింగ్‌పై అనిశా అధికారులు ఆరా తీశారు. ఇందులో భాగంగా పూసపాటిరేగ తహసీల్దార్‌ ‌కార్యాలయంలో అన్ని అనుమతులు పూర్తయి.. రైతులకు పంపిణీ చేయని 471 పట్టాదారు పాసుపుస్తకాలు, 629 ఇళ్ల పట్టాలను అనిశా అధికారులు గుర్తించారు.

Leave a Reply