Take a fresh look at your lifestyle.

దివికేగిన మేరునగం..!

(మాజీ రాష్ట్రపతి ప్రణబ్‌ ‌ముఖర్జీకి కవితా నివాళిగా)

నాలుగు తరాల మార్గదర్శి
అధినాయకులకే అద్వితీయుడు
విలువలు వదలని సచ్ఛీలుడు
మంత్రాంగంలో అపర చాణక్యుడు !రాజకీయ వైకుంఠపాళిలో…
విషసర్పాలకు చిక్కకుండా..
నిచ్చెన ఎక్కగల ధీశాలే కాదు
పదవులకే వన్నె తెచ్చిన నాయకుడు !

ట్రబుల్‌కే  ట్రబుల్‌ ‌షూటర్‌ ‌నీవు
మూర్తీభవించిన ముఖర్జీ మూర్తిమత్వం..
స్వదేశీలకు గర్వకారణమే కాదు..
పరదేశీయులకు ఈర్ష్యాజనకం కూడా !

పని భారమెంతైనా వెరవక..
నవ్వుతూ మోయగల మేథోశక్తి
రాజకీయాల్లో అతి చతురుడు
భావోద్వేగాల్లో గంభీరుడు !

అపరచాణక్య వ్యూహకర్త..
రాజ్యాంగాన్ని ఔపోసన పట్టిన..
రాజకీయ దురంధర శిఖరం
ఐదున్నరడుగుల విజ్ఞాన బులెట్‌ !

‌మేధావులకే అపరమేధావి
సంక్షోభ పరిష్కార దిగ్గజ నేత
రాజకీయ యుద్ధాల్లో సహితం..
ఆరితేరిన పోరాట యోధుడు !

బడబాగ్నులెన్ని మదిన రగిలినా..
ప్రశాంత సముద్ర వదనుడు
యావద్దేశాన్ని శోక సంద్రంలో..
వదిలి వెళ్ళిన బహుముఖ ప్రజ్ఞాశాలి !

చరిత్రపై చెరగని సంతకం
కనుమరుగైన అనుభవశాలి
దివికేగిన మేరునగధీరుడు
ప్రణామాలు ప్రణబ్‌ ‌దాదా !

కంప్యూటర్లే తల దించుకునే..
అసమాన జ్ఞాపకశక్తి నీ సొంతం
నిశ్చితి అనిశ్చితాల నడుమ..
నిబ్బరంగా పయనించిన బాటసారి !

పడిలేచే ఉత్తుంగ తరంగం
సంకీర్ణ సంస్కరణ పథాలకు..
ముందు వెనుకా నీ అడుగులే
భారత చరిత్రలో చైతన్య సాక్షి !

పాలిట్రిక్స్ ‌రాని అజాత శత్రువు
పల్లె గుడ్డి దీప వెలుగులోంచి..
తళుకులీను రాష్ట్రపతి భవన..
మ్నెట్లెక్కిన దేశ ప్రథమ పౌరుడు !

ప్రజాస్వామ్య హితైషులందరికీ..
శరాఘాతం సమాన దార్శనికత
రాజ్యాంగ వనమాలి ప్రణామం
నీ మరణం ఓ అనంత అగాధం !

లక్షల తెలంగాణీయుల కన్నీళ్లకు..
ఒక్క సిరా చుక్కతో ఫుల్‌స్టాప్‌ ‌పెట్టి..
తెలంగాణాను ఇచ్చిన భారతరత్న
మా గుండెల్లో నీవెపుడూ పదిలమే !

burrah madhava reddy
డా: బుర్ర మధుసూదన్‌ ‌రెడ్డి
విశ్రాంత ప్రధానాచార్యులు, ప్రభుత్వ డిగ్రీ పిజీ కళాశాల, కరీంనగర్‌ -99497 00037

Leave a Reply