Take a fresh look at your lifestyle.

‌భూమిపూజ

నూతన శాసనసభ, సచివాలయం భవనాలకు సీఎం కేసీఆర్‌..

పాల్గొన్న మంత్రులు, ఎమ్మెల్యేలు

ఫోటో: తెలంగాణ సచివాలయం, అసెంబ్లీ భవనాలకు శంకుస్థాపన చేసిన సిఎం కెసిఆర్‌.

నూతన శాసనసభ భవనం, సచివాలయ నిర్మాణాలకు తెలంగాణ ముఖ్యమంత్రి కేసీఆర్‌ ‌గురువారం ఉదయం భూమిపూజ చేశారు. ప్రస్తుత సచివాలయ ప్రాంగణంలోనే కొత్త సెక్రటేరియట్‌ ‌నిర్మాణానికి ఉదయం భూమిపూజ చేసిన ముఖ్యమంత్రి కేసీఆర్‌.. అక్కడి నుంచి ఎర్రమంజిల్‌లోని రోడ్లు భవనాలశాఖ ఆవరణానికి చేరుకుని కొత్త అసెంబ్లీ భవన నిర్మాణానికి భూమిపూజ చేశారు. వేదపండితులు కేసీఆర్‌తో భూమిపూజ చేయించి భవన నిర్మాణాలకు శంకుస్థాపన చేశారు. ఈ భూమిపూజ కార్యక్రమాల్లో రాష్ట్ర మంత్రులు, ఎమ్మెల్యేలు, ఎంపీలు, ఎమ్మెల్సీలు, జెడ్పీ చైర్మన్లు పాల్గొన్నారు. ప్రస్తుత అసెంబ్లీ భవనం నిజాం కాలం నాటిది కావడంతో ఇప్పటి అవసరాలకు తగ్గట్టుగా కొత్తది నిర్మించాలని కేసీఆర్‌ ‌నిర్ణయించారు. ఎర్రమంజిల్‌లోని రోడ్లు భవనాలశాఖ ఆవరణలో 17.9 ఎకరాల విస్తీర్ణంలో అసెంబ్లీ భవనాలను నిర్మించనున్నారు. రూ.100 కోట్లతో శాసనసభ, మండలి, సెంట్రల్‌ ‌హాల్‌లను నిర్మిస్తారు.

అలాగే, ప్రస్తుతం ఉన్న సచివాలయం డి-బ్లాక్‌ ‌వెనుకభాగంలోని తోటలో కొత్త సచివాలయ భవనానికి భూమిపూజ జరిగింది. సుమారు రూ.400 కోట్లతో ఈ కొత్త సచివాలయాన్ని నిర్మించనున్నారు. ప్రస్తుతం 25 ఎకరాల్లో ఉన్న సచివాలయాన్ని 30 ఎకరాల మేరకు విస్తరించనున్నారు. ప్రస్తుతం ఉన్న సచివాలయం వాస్తు పట్ల సీఎం కేసీఆర్‌ ‌తీవ్ర అసంతృప్తితో ఉన్న సంగతి తెలిసిందే. రాష్ట్ర విభజన జరిగిన తరవాత 2014 జూన్‌లో తొలిసారి కేసీఆర్‌ ‌సీఎం అయ్యారు. ఆ తర్వాత సచివాలయాన్ని సందర్శించిన కేసీఆర్‌ ‌దాని తీరుపై అసంతృప్తి వ్యక్తం చేశారు. భవన నిర్మాణాలు సరిగా లేవని భావించారు. ప్రగతిభవన్‌ ‌నిర్మించిన తర్వాత ఆయన సచివాలయానికి రాలేదు. కొత్త సచివాలయానికి నగరంలోని పలు ప్రాంతాలను పరిశీలించారు. ఎర్రగడ్డ, బైసన్‌ ‌పోలో మైదానం వంటివి పరిశీలించినా.. అవి కార్యరూపంలోకి రాలేదు. చివరికి ప్రస్తుతం ఉన్న చోటే కొత్త సచివాలయాన్ని నిర్మించాలనే నిర్ణయానికి కేసీఆర్‌ ‌వచ్చారు. ఈకార్యక్రమంలో రాష్ట్ర మంత్రులు మహమూద్‌ అలీ, మల్లారెడ్డి, జగదీశ్‌రెడ్డి, కొప్పుల ఈశ్వర్‌, ఇం‌ద్రకరణ్‌రెడ్డి, ప్రశాంత్‌రెడ్డి, ఎర్రబెల్లి దయాకర్‌రావు, శ్రీనివాస్‌గౌడ్‌, ‌సీఎస్‌ ఎస్‌.‌కె. జోషి, ఎంపీ కేశవరావు, పలువురు ఎమ్మెల్యేలు, ఎమ్మెల్సీలు, ఉన్నతాధికారులు కార్యక్రమంలో పాల్గొన్నారు.

Leave a Reply

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy