Take a fresh look at your lifestyle.

అప్పుల్లో ఉన్న ప్రభుత్వాన్ని.. ప్రైవేట్‌ ‌వ్యక్తులకు అప్పగిస్తరా..?

ఆర్టీసీని ప్రైవేట్‌ ‌పరం చేసేందుకు సీఎం కేసీఆర్‌ ‌కుట్ర
సమ్మెకు అఖిలపక్షం సంపూర్ణ మద్దతు
అప్పుల్లో ఉన్న ఆర్టీసీని ప్రయివేటీకరణ చేస్తానని చెబుతున్న సీఎం కేసీఆర్‌.. ‌మరి అప్పుల్లో ఉన్న ప్రభుత్వాన్ని ప్రయివేట్‌ ‌వ్యక్తులకు అప్పగించగలరా అంటూ ఆర్టీసీ ఐకాస కన్వీనర్‌ అశ్వత్థామరెడ్డి ప్రశ్నించారు. ఆర్టీసీ కార్మిక సంఘాల జేఏసీ పిలుపుమేరకు అఖిలపక్ష సమావేశానికి బీజేపీ, టీడీపీ, టీజేఎస్‌, ‌కమ్యూనిస్ట్ ‌పార్టీలు, జనసేన పలు ఉద్యోగ సంఘాలు హాజరయ్యాయి. సోమాజీగూడలోని ప్రెస్‌క్లబ్‌లో బుధవారం నిర్వహించిన ఈ సమావేశానికి బీజేపీ నేత రామచంద్రరావు, టీజేఎస్‌ అధ్యక్షుడు కోదండరామ్‌, ‌సీపీఎం రాష్ట్ర కార్యదర్శి తమ్మినేని వీరభద్రం, టీడీపీ నేత రావుల చంద్రశేఖర్‌రెడ్డి, సీపీఏ నేత సుధాకర్‌, ‌జనసేన నేత శంకర్‌ ‌గౌడ తదితరులు హాజరయ్యారు. ఇప్పటి వరకూ చేపట్టిన నిరసనలు, భవిష్యత్తు వ్యూహంపై అఖిలపక్షంలో చర్చిస్తున్నారు. భేటీ అనంతరం భవిష్యత్‌ ‌కార్యాచరణను ప్రకటించారు. ఈ సందర్భంగా అశ్వత్థామరెడ్డి మాట్లాడుతూ.. సమ్మె ముఖ్య ఉద్దేశం జీతభత్యాలు కాదని, ఆర్టీసీని బతికించుకోవడమే తమలక్ష్యమని అన్నారు. గత ఐదేళ్ల నుంచి ఆర్టీసీలో ఒక్క నియామకం జరగలేదని విమర్శించారు. ఆరేళ్లలో ఆరువేల మంది పదవీవిరమణ చేశారని తెలిపారు. నేనే రాజు నేనే మంత్రి అన్నట్టు కేసీఆర్‌ ‌వ్యవహరిస్తున్నారని.. ప్రజలు కూడా మమ్మల్ని అర్ధం చేసుకోవాలని ఆయన అన్నారు. కేసీఆర్‌ ఆర్టీసీని ముంచే ప్రయత్నం చేస్తున్నారని ఆయన దుయ్యబట్టారు. ఈ విషయంలో తమకు రాజకీయ పార్టీలు దిశానిర్దేశర చేయాలని అశ్వత్థామరెడ్డి కోరారు. ముఖ్యమంత్రి చాలా విచిత్రంగా మాట్లాడుతున్నారని, కార్మికులు దాచుకున్న ఫీఎఫ్‌ ‌డబ్బును ఎందుకు ఇవ్వడం లేదని ఆయన ప్రశ్నించారు. ఆర్టీసీపై ఇంధన భారం ఎక్కువైందని చెప్పి డీజిల్‌పై 27శాతం పన్ను వేస్తున్నారని ఆయన ఆరోపించారు. రాష్ట్రంలో నాలుగో వంతు ప్రజలు ప్రజా రవాణా వ్యవస్థపై ఆధారపడి ఉన్నారని, వారంతా మా సమ్మెకు సంపూర్ణ మద్దతు తెలుపుతున్నారని వెల్లడించారు. అవసరమైతే తెలంగాణ బంద్‌కు పిలుపునిస్తామని హెచ్చరించారు. ప్రభుత్వ నిర్ణయాన్ని న్యాయపరంగా ఎలా ఎదుర్కోవాలో ఆమేరకు ముందుకెళ్తామన్నారు.

Leave a Reply

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy